WILLEMSTAD.- Hans-Erik Dijkstra (1969) ta un pianista klásiko hulandes ku un karera impreshonante. El a kaba konservatorio cum laude, a duna konsierto rònt Oropa, na Merka, China i Dubai, ela toka pa famia real na kas, komo pianista di orkesta ela toka hopi biaha pa radio i televishon hulandes i komo kompañante el a toka ku artistanan klásiko konosí na Oropa. Dia 1 di mei e ta toka un programa klásiko romántiko riba un piano di kola (“concert grand”) na Sentro Kultural Kòrsou.

Ta promé biaha ku Hans-Erik Dijkjstra ta bishitá Kòrsou. Pero musikalmente e tin lasonan ku nos isla pa basta tempu. Su tata tabata bin for di Hulanda regularmente pa bishita di trabou, i tabata trese muzik di piano di Kòrsou p’e tende. Asina ela haña un amor pa por ehèmpel e walsnan di Wim Statius Muller. Dijkstra a kuminsá su estudio di piano klásiko pareu ku nos pianistanan lokal Ilja de Bell-Huang i Carolina Nicolaas den mesun klas na mesun konservatorio, Twents Conservatorium ku awendia yama Artez, i komo profeshonal el a kompañá nos mezzo soprano Tania Kross tambe. Pues e ta hopi kontentu di porfin por bishitá nos isla i tene un konsierto.
Despues di a gradua den piano i komposishon na Twents Conservatorium, ela sigui spesialisá na Hogeschool voor de Kunsten na Utrecht. Komo hóben profeshonal el a haña trabou komo kompañante na Koninklijk Conservatorium di Den Haag, Nederlandse Reisopera i klasnan di opera na konservatorionan di Rotterdam i Enschede.
Banda di esei e tabata e pianista vast di Radio Symfonie Orkest i Radio Philharmonisch Orkest ku tabata transmití bibu for di Concertgebouw na Amsterdam i Vredenburg na Utrecht.
Ela tene gira den Oropa, Merka, China i Dubai. Huntu ku Prinsesa Christina ela hasi diferente biahe pa Inglatera kompañando instrumentalistanan hóben ku a gana Prinses Christina Concours. Tambe ela yega di toka konsierto privá pa reina Beatrix. Dijkstra no solamente ta pianista, e ta kompositor tambe. El a komponé 3 operá i vários piesa pa piano i konhunto chikitu.

E konsierto ta tuma lugá dia 1 di mei mitar di 11 di mainta den sala di Cultureel Centrum Curaçao/Sentro Kultural Kòrsou na Koninginnelaan den Emmastad. Durashon lo ta masomenos 1 ora i e tipo di muzik lo ta klásiko suave, romántiko i virtuoso. Bishitantenan ta haña té ku ku kòfi i kos dushi grátis. Karchinan ta optenibel na Mensing’s i Van den Tweel Zeelandia òf online via www.caribbeanticketshop.com. Adulto ta paga 35 florin, hóben ta paga 20 florin.