WILLEMSTAD. - Ayera durante un rueda di prensa, Lider di Frakshon di Partido MFK, sr. Gerrit Schotte a trese dilanti ku awor ku nan tin e rapòrt di e grupo belgikano ku a bin pa investigá e desaroyo di e konstrukshon di Hospital Nobo (HNO),  a duna di konosé ku ta prohibí pa lubidá kon den aña 2013 durante un reunion maratóniko te den oranan di mardugá, Promé Minister Daniel Hodge a haña instrukshon di e koalishon nobo pa e firma pa kambia lokalidat di konstrukshon di hospital for di tereno di Amstel i bai Otrobanda.

Schotte a mustra riba e echo ku dia 11 di aprel 2013 tabatin un moshon, ku ta bisa ku ta disidí ku gobièrnu di Kòrsou den kuadro di di su responsabilidat pa traha e hospital nobo na Otrobanda.

Schotte a trese dilanti ku for di 2013 bin ariba, gobièrnunan na turno a tuma sierto desishonnan ku a kousa un asina yamá ‘verdamping’ di 64.2 mion florin riba e 450 mion florin presupuestá pa konstrukshon di Hospital Nobo.

Dor di un struktura organisatorio kompleho ku ta konta ku hopi kontrato i akuerdonan kaminda diferente interes ta involukrá, ta e motibu prinsipal ku konstrukshon di un hospital nobo no ta wòrdu logra konforme e planifikashon inisial.

Durante di e trayekto di konstrukshon ku ta andando no tabata tin un asina yamá “Ownership/Gezag”. SONA no a mantené un asina yamá “regie” ku konsekuentemente fayonan ku a wòrdu kometé tur dia i esaki a trese hopi ‘tegenvallers’ i konflikto entre tur esnan ku tin un akuerdo kuné.

Ke men, desishonnan ku no a wòrdu tuma na tempu ku no tabata na benefisio di e proyekto, miéntras ku tabata tin sufisiente tempu pa a hasi esaki efisiente i efektivo, ta pone ku gastunan a subi enormemente i tin e tendensia ku e gastunan lo sigui subi.

Schotte a trese dilanti ku na e momentunan aki ta hasi menshon di 64.2 mion florin adishonal riba e presupuesto di hospital. Si kos sigui manera e ta bai aki, e 64 mion aki lo por sigui subi na sumanan kuantioso, Schotte a bisa.

E loke ku ta hasi mas doló, ta e echo ku e plaka aki no ta pa kuenta di niun polítiko ku a tuma tal desishon, pero ta komunidat di Kòrsou ta paga esaki.