...Parlamentarionan, ministernan i miembronan di Invenstment Team durante rekorido den parke di mangrove. Foto FB di sra. Zita Jesus-Leito...

WILLEMSTAD.- Ayera mainta minister sra. Zita Jesus-Leito huntu ku un delegashon di Konseho di Minister, parlamento i tambe dje Investment Team a realisá un bishita den e Parke di Palu di Mangel na Rif i e kaminda ku ta den konstrukshon.
Sra. Jesus-Leito a bisa di a bishita 2 proyekto impaktante di e programa di desaroyo di Rif. E Parke di Palu di Mangel su konstrukshon ta finalisando i tambe e delegashon por a tuma nota di konstrukshon di e kaminda ku lo konektá otro banda ku Mega Pier.
Falta solamente algun siman mas pa e trabounan finalisá pa asina komunidat por disfrutá di e parke úniko aki ku ta situá den Kòrsou su sentro di siudat.
Mas aleu sra. Jesus-Leito a bisa ku a kap algun mata di mangrove, pero tin algun chikí ku ta kresiendo, miéntras solo ta pasa dor dje parke. E parti pabou ku tin mangrove tambe tei planta algun mata. Kòrsou ta haña un parke bunita, i lo no tin sangura mas. Tambe a habri e kanal pa laman, pues awa salu ta drenta den e área, i tin sirkulashon di awa. Ta premirá ku den ougùstùs e kaminda ta keda kla.
Ta masha poko trabou falta pa kaba entre otro e “Uitkijktoren” ku mester bin na e sitio. Carmabi tesun ku lo haña maneho dje parke. Na e sitio aki no ta e parke di mangrove so tin, pero e “gemal” ku a drecha, e kaminda ku ta konektá Mega Pier 2 ku Pater Euwensweg, un kaminda ku ta pasa entre Stadion di Rif i SVB bai pariba, i tin e Sentro di Bishita di Carmabi ku mester bin na e sitio. Skolnan por bishita e parke, i por paga pa kore ku kanoa dor dje parke. Tambe lo bin un brùg na altura di Corendon pa bai na e otro parti dje mangrove.
Pisina Benny Leito entre tantu a drecha su sistema di atendé ku e awa dje pisina, i ta resiklá e awa. E proyekto ta masha bunita ora e keda kla. No lubidá ku ta trahando un hotel den e área i ainda falta e fase 2 dje proyekto hotelero di Corendon. Pues un desaroyo total den e área. Iluminashon dje parke lo bin despues.