Margy Bond, Kònsùl general na Konsulado Merikano di Kòrsou ta tuma despedida e siman aki di Kòrsou i tambe e otro islanan di eks Antia.
Margy ta den su rekto final pa bai bèk Merka despues di 2.5 aña riba nos isla. Bou di e dos aña i mei ku Margy tabata na Kòrsou el a duna inisio na diferente proyekto ku nos ke pone énfasis riba dje.
Despues di 2.5 aña Margy ta bai bèk Merka, nos no ta bisa ayó pero mas bien te aweró, komo nos sa ku Margy lo bini Kòrsou bèk paso e stima nos isla. Margy a konta kiko tabata su espektativa ora el a yega Kòrsou. Margy a konta ku Kòrsou tabata su promé eskoho. E tabata tin hopi gana di bin Kòrsou. Ora el a yega promé kos ku el a hasi ta eksplorá e isla i konosé e hhabitantenan. “Mi ekspektativa a keda surpasá ora mi a mira i sinti kon dushi e hendenan di Kòrsou ta. Aunke mi tabata leu for di kas, mi a sinti mi na kas. Mi a disfrutá di tur kos, for di kuminda te na e kultura, e playanan i e hhabitantenan. Mi a sinti mi bendishoná’, tabata palabranan di Margy.
Hendenan di Kòrsou ta maravioso
Segun Margy loke el a gusta mas di Kòrsou ta e habitantenan. E hendenan di Kòrsou ta maravioso. E kultura ta konsistí di diferente nashonalidat. E isla tin un historia bunita i e hendenan ta resistente kla pa kombatí kualkier desafio. Tur hende ku el a konosé ta biba un bida pleno, nan tin mas ku 1 responsabilidat. Margy a menshoná ku el a purba diferente kuminda pero loke el a gusta mas tantu ta funchi hasá ku keshi, arepa di pampuna i mangusá. Uniko kaminda ku bo por haña mangusá ta riba kaminda pa Westpunt nèt banda di e misa di Soto. Einan tin un señora ta bend’é. Adishonal e gusta tutu.
Renovashon di MoU pa konseho pa bai studia na Merka
Margy a sigui konta di e proyektonan ku Konsulado Merikano na Kòrsou a ehekutá den último dos aña i mei. Dos di e proyekto aki ta mará na edukashon, ku ta Edukashon Merikano i Edukashon Primario. Aña pasá a firma e MoU ku gobièrnu i e aña aki na luna di mart a renová e MoU di Edukashon Merikano. E proyekto aki ta enserá un sentro ku ta duna konseho pòrnada na studiante òf e mayor ku ta interesá pa sa mas tokante di studia na Merka. Margy ta enfatisá ku e sentro ta pòrnada i niun hende no por aserká bo pa paga pa konseho. Na e sentro lokalisá na SSC, tin un konsehero full-time, Jessie. Su trabou ta pa konsehá e studiante riba e universidat di eskoho, kuantu aña lo ta kumbinié, sea 2 aña òf 4 aña di ‘college’, ki ta rekerí pa optené e total ECT òf kon bo por haña un visa. Tambe e sentro ta proveé video òf presentashon virtual di e universidat pa por haña un bista di e universidat na Merka. E sentro no ta solamente pa studiante ku ta hasi uso di SSC pero pa tur studiante ku ta interesá di bai studia na Merka. Bo por asta hasi informashon tokante di ‘scholarship’. Huntu ku minister di Enseñansa nan a krea un kolaborashon ku universidat di Merka. Asina studiantenan por risibí un ‘in state tuition’. Margy ta kontentu di por anunsiá ku den kolaborashon ku direktor di SSC Sydney Justiana nan por ekspandé e proyekto aki pa di 3 aña. Tambe na e sentro aki e hóben studiante por hasi uso di e sentro di kòmpiuter pa trabou di skol òf pa investigashonnan.
Ta sigui ku ingles den skolnan
Otro proyekto ta esun pa edukashon primario di edukashon na ingles. Margy ta hopi entusiasmá ku e proyekto aki tambe i siman pasá a bishitá St. Antonius College, ku a forma parti di e proyekto. Esaki tabata un di su prioridatnan promé ku e bai Merka bèk. E inisiativa pa krea un programa ingles a kuminsá ku e kontakto ku algun eksperto, edukador i konsehero for di Merka, pa wak tur e kuríkulonan ku tin na Merka, pa wak kua ta mas efektivo na Kòrsou. Nan a kue e kuríkulo mas efektivo i adaptá esaki ku e informashonnan relevante pa Kòrsou. Nan no ta oponé nos kultura, idea òf ehèmpel. Nan ta simplemente usa e kuríkulo i adaptá esaki pa e ta mas konfortabel pa e alumno. Una bes tabatin e kuríkulo, tabata tin mester di un skol i St. Antonius College su konseheronan a indiká ku nan lo ke partisipá den e programa. Asina aña pasá sèptèmber a introdusí e dos klasnan primario kompletamente na ingles. Konsulado Merikano a paga kurso pa tur e maestronan enbolbí i otronan ku tabatin interes. Siman pasá sra. Bond a partisipá huntu ku e muchanan, dor di lesa buki i papia ku nan. ‘Nan ta mané spòns chikitu ku ta apsorbá tur informashon, i tambe nan ta hopi konfortabel. Mi a mira e alumnonan masha konsentrá ta traha matemátika na ingles. E maestronan ta fenomenal i a hiba e programa mas leu ku nos a spera, asina ta ku próksimo aña eskolar lo bai introdusí mas klas na ingles. Lo bai tin klas primario i e siguiente klas na ingles. E programa tabata unu fruktífero ku St. Antonius College i tin e pensamentu pa introdusí e programa aki na e banda Ost di e isla tambe”, segun Margy Bond. Ademas, siman pasá Margy tabata tin un kombersashon ku minister van Heydoorn ku a indiká ku e lo tin gana di sigui ku e proyekto aki pa skolnan públiko i mesora sra. Bond a kontestá ku nan lo tei pa yuda desaroyá e programa. Por subi wèpsait di Konsulado Merikano kaminda por haña e kursonan di e programa ingles kompletamente grátis. Kualke maestro por tira un bista i adaptá esaki na e manera ku e ta sinti ta yega mas fásil na e alumno. Asta si bo no ta un skol ingles bo por praktiká ku un di e materianan. Den futuro eksámennan di Havo lo bai bira na ingles i e universidatnan na Hulanda tambe ta apliká e idioma ingles. Kòrsou su ingles ta hopi bon kaba i ta bon pa sigui traha riba dje Margy a opservá.
Programa YLAI
Aparte di studiante, Konsulado Merikano tin e proyekto “Young Leaders of the Amérika Inisiative”, di kual personanan entre 25 pa 35 aña por apliká pa e programa. Ku orguyo nos por bisa kon e proyekto aki a krese. Aña pasá nos mester a aserká hendenan pa partisipá pero e aña aki, mas bien el a bai di boka pa boka. E eks graduadonan ta kompartí nan eksperensia riba retnan sosial. Durante di 5 siman e hóben ta traha ku negoshinan òf organisashonnan lokal na Merka pa asina haña eksperensia i práktika kon pa manehá un negoshi. Mas ku 2000 hóben ta forma parti di e programa. Tur biaha ku tin un diálogo, sea na Kòrsou òf Aruba semper ta invitá un òf mas alumno ku a yega di partisipá kaba i duna nan e oportunidat pa konta nan eksperensia pa por inspirá otro hóbennan. “I manera mi a menshoná algun biaha kaba ku tur gastu ta kai bou di Konsulado Merikano. Nos ta rekonosé ku Kòrsou su hendenan tin un bida pleno ku hopi responsabilidat i nos ta rekonosé e sakrifisio di 5 siman aki. Nos ta hañ’é di suma balor i p’esei nos ta kubri henter e evento”, Margy Bond a sigui bisa.
Reevaluá diseño pa edifisio konsulado
Temporada Konsulado tabata konsiderá Landhuis Sorsaka komo un posibel lokalidat, nan tabata enfrentá un desafio. Diferente bia nan a komuniká ku ministerio di VVRP. Pero na final, no tabata nesesario pa nos realoká. Sra. Bond tabatin un gran vishon pa realisá esaki, e ta un tiki desepshoná pero tambe aliviá ku nan no mester a move. I pa kontestá e punto di rekonstrukshon, nan tin un plan pa rekonstruí Konsulado Merikano pa hopi aña kaba. Nan a risibí diferente oferta di kual tur ta surpasá e presupuesto. P’esei a bolbe evaluá e diseño i propósito pa por haña un preis den e presupuesto ku tin. Komo ku kongreso ta estrikto den su presupuesto na e momentunan aki mirando tur e kosnan ku ta pasando. Nan ta bai reagrupá i tuma un otro bista na e diseño. Sra. Bond no tin duda ku den futuro ta bai haña e presupuesto nesesario.
Interkambio di universidat
Margy a indiká ku semper lo bai tin mas trabou pa hasi. Aña pasá a sera un aliansa universitario ku Aruba i universidat di Merka riba ingenieria sostenibel. Ta promé bia tabatin un proyekto asina kaminda hóbennan di tur dos skol a bin Aruba, nan a topa ku otro i a traha huntu riba un proyekto. Esnan di Merka a bai bèk i e hóbennan a sigui traha riba e proyekto. E proyekto tabata kon ta laga un hotèl ta mas sostenibel posibel. Pronto lo presentá e resultado di e proyekto aki segun sra. Bond.
Seguridat i kumplimentu ku lei
Margy Bond no por a terminá sin tambe papia riba e área di seguridat i kumplimentu ku lei kaminda tambe nan a hasi masha hopi trabou. I e trabou ku nan a hasi ta danki na e relashon ku tin ku instansianan hudisial lokal, ku esnan di Aruba, St. Maarten, Warda Kosta lokal, ku Marechaussee. E ta un relashon di bèrdat i esei ta danki na e kooperashon ku otro. I ta danki na e relashon ei ku den 2023 tabatin resultadonan ku nunka promé, sigur den último 10 aña no a haña, entre nan konfiskashon di droga ku a suma 2,2 bion dòler. Margy a manda su rèspèt total pa tur e koleganan ku ta traha den e área aki.
E próksimo parada lo ta den e instituto di pas
I e próksimo stòp di Margy ta ku e ta bai bèk Washington DC kaminda e lo bai traha na e instituto di pas. Ta trata aki di un instituto ku a keda fundá pa kongreso i ta traha riba temanan di pas i seguridat i e meta ta pa evitá konflikto, mitigá konflikto i ta hasié pa medio di investigashonnan sientífiko. Margy lo bai traha einan i tambe lo traha riba tópikonan di Afrika sentral i esei lo hib’é tambe na un di su promé trabounan ku ta voluntario di pas na Congo i e lo por duna su kontribushon pa atendé ku esaki.
Margy te despues!
