WILLEMSTAD – Awe mainta 8 di febrüari 2019, a tuma lugá e apertura ofisial di e “Vierlandenoverleg”. E “Vierlandenoverleg” ta un enkuentro ofisial di e kuater gobièrnunan di paisnan Kòrsou, Aruba, Sint Maarten i Hulanda kaminda ta bai interkambiá di konosementu, a traha palabrashonnan konkreto i firma akuerdonan riba temanan di interes komun relashoná ku Enseñansa i Kultura. Meta di e enkuentro aki ta pa fortalesé e lasonan entre e paisnan, sostené i fortifiká otro den e diferente trabounan.  Kada un pais ta keda representá dor di un o mas minister huntu ku nan delegashon:

Minister di Enseñansa, Siensia, Kultura i Deporte pa Kòrsou, sra. Marilyn Alcalá-Wallé, minister Armando Lampe i minister Xiomara Ruiz-Maduro di Aruba, minister Wycliffe Smith di St.Maarten i minister Ingrid Engelshoven di Ulanda.

Durante e mainta e ministernan ta trata puntonan ku ta regardá entre otro sosten den formashon di maestronan, areglo pa e Efekto Sivil pa e studiantenan ku terminá nan estudio den Fakultat di Derecho pa por traha sin restrikshon den tur e kuater paisnan den Reino, Finansiamentu di estudio (studiefinanciering), mehorashon di e fluho di studiantenan pa estudionan  avansá i superior na Ulanda. I pa mehorá  éksito di nos studiantenan den eksterior.

Alabes ta duna atenshon na e aspekto pa krea mas posibilidat pa nos studiantenan di enseñansa di fishi por hasi nan stazje den un di e paisnan den Reino pa amplia nan horizonte. Un otro punto ta e maneho di Idioma i enseñansa bilingual den skolnan i e forma ku por hasi e términonan final (CXC)

Riba tereno kultural ta duna atenshon na e.o. konservashon di herensia kultural supakuátiko, un fondo pa Kultura i atenshon pa nos herensia kultural intangibel . Finalmente ta duna atenshon na e preparashon di e 40 seshon di UNESCO 2019.