WILLEMSTAD.- Bou di guia di Dr. Odette van Brummen-Girigori a hasi un investigashon kuantitativo. Esaki ta pa señalá e konsumo finansiero total dje bishitantenan i televidentenan di e Festival di Tumba durante e siman di 26 te ku 31 di yanüari 2020. Total a kolekshoná informashon bou di 1405 persona konsistiendo di 646 hende hòmber i 759 hende muhé.

A hasi investigashon bou di dos supgrupo. Den e promé supgrupo a entrevista personalmente 802 bishitante di Festival di Tumba i den e di dos supgrupo a bèl 603 televidente di Festival di Tumba 2020.

Promé supgrupo

Den e análisis ku a tuma lugá e resultadonan ta laga mira ku kasi 4 di 10 bishitante (38 %) a gasta mas ku 500 florin relashoná ku nan bishita na e Festival di Tumba. Alabes 19.5% di bishitantenan a gasta entre 251-500 florin; 12.2% a gasta entre 101-150 florin; 10.1% entre 210-250 florin; 9.0% entre 151-200 florin; 6.4% entre 51-100 florin i por último 4.7% a indiká ku nan a gasta entre 0 pa 50 florin.

Pa ta mas spesífiko, kasi 9 di 10 bishitante (88.8%) a indiká ku nan a hasi gastunan pa konsumo, algu mas ku un terser parti pa gastunan di parker i kasi 1 riba 10 na gastunan di transporte manera taxi, bùs i òf outo di hür. Ademas 4 di 10 bishitante a indiká ku nan a hasi gastunan relashoná ku kompra di paña i òf sapatu. Tres di 10 relashoná ku kuido personal manera kapsalon, manikür i òf make-up.

Por último a resultá ku bishitantenan di Festival di Tumba 2020 a gasta un promedio di 323.38 florin ku e evento aki. Ademas e konsumo kalkulá di bishitantenan di e Festival di Tumba durante dje siman di 26 te ku 31 di yanüari 2020 a sali 3 mion 233 mil 800 florin.

Segundo supgrupo

Den e di dos parti dje investigashon a averiguá te na ki medida televidentenan a hasi gastu relashoná ku wakmentu di Festival di Tumba na televishon. Relashoná ku e resultadonan a sali afó ku 3 di 10 televidente a invitá un òf mas persona pa wak huntu e Festival di Tumba na televishon.

Mas aleu a resultá ku algu mas ku 6 di 10 televidente a hasi gastu relashoná ku esaki. Mas o ménos 4 di 10 televidente (42.1%) a indiká ku nan a gasta entre 0 pa 15 florin; mas o ménos 2 di 10 televidente (18.9%) a gasta entre 51-100 florin; kasi 1 riba 10 (9.5%) a gasta entre 101-150 florin; 7.1% entre 201-250 florin; 6.3% entre 151-200 florin i solamente 3.7% a gasta mas ku 500 florin.

Por último a resultá ku televidentenan di Festival di Tumba a gasta un promedio di 128,48 florin relashoná ku e evento aki . A base di esaki ta kalkulá ku e televidentenan di Festival di Tumba 2020 a gasta un suma total di 3 mion 212 mil florin.

Konklushon

E resultado nan relashoná ku e investigashon ta laga mira ku tantu e bishitantenan komo e televidentenan di Festival di Tumba 2020 a hasi gastunan pa un suma konsiderabel relashoná ku e evento aki. A base di e ekstrapolarisashon ta kalkulá ku un total di 6 mion 445 mil 800 florin a keda gasta dor di bishitantenan i televidentenan di e Festival di Tumba 2020.

Ademas e resultado ta sugerí ku e Festival di Tumba ta duna un impulso na e ekonomia di Kòrsou, o sea, e resultadonan aktual ta duna vishonnan/ideanan nobo ku mester keda diskutí mas aleu pa stimulá ekonomia di Kòrsou, teniendo na kuenta ku e realidat nobo den kua nos ta biba.

... Odette van Brummen – Girigori, lider di investigashon di UoC ...