Marvelyne Wiels a aktua kontra Areglo Estado

WILLEMSTAD.-Parlamento di Kòrsou a duna enkargo na Kontraloria General di Kòrsou pa hasi un investigashon profundo relashoná ku e benta i kompra di edifisionan na Kas di Kòrsou Ulanda. Bou di e eks minister plenipotensiario Marvelyne Wiels Kas di Kòrsou a bende e edifisionan ku tabata sirbi komo ofisina i residensia di e mandatario na Ulanda i despues a kumpra un edifisio i drecha esaki.ta trata di e edifisionan situá na Badhuisweg 173, 175 i Wagenaarweg 3. Punto ta ku e benta di e edifisionan no a sigui debí ku Parlamento no a aprobá e benta aki.

Basá riba e investigashon, Kontraloria ta konkluí ku tantu e benta di e edifisionan komo e kompra di e edifisio nobo no a bai segun tur e reglanan stipulá den lei i regulashon. Tambe nos a konkluí ku durante e proseso enkaminá pa tantu e benta komo e kompra, no a tene kuenta ku e eksigensianan di efisiensia.

Pa loke ta trata legalidat di benta i kompra di e edifisionan, e investigashon a saka na kla ku Konseho di Minister a aprobá e benta di e edifisionan sin a konvensé su mes ku e minister plenipotensiario anterior a sòru di kumpli ku tur regla stipulá den lei, promé ku entregá e petishon pa aprobashon di e benta.

Ademas Konseho di Minister a aprobá e benta di e edifisionan di ofisina i a bai di akuerdo pa apoderá e minister plenipotensiario anterior pa sera un kontrato di benta tentativo. Sinembargo, gobièrnu no a apoderá e minister plenipotensiario anterior ofisialmente pa e por a firma e kontrato akí. Ta falta e apoderashon pa medio di un dekreto gubernamental. Pues e minister plenipotensiario anterior a aktua kontra di Areglo di Estado, pasobra el a firma e kontrato di benta tentativo sin ta apoderá formalmente.

Pues e minister plenipotensiario anterior (red.Marvelyne Wiels) a komprometé gobièrnu na benta di e residensia ofisial na un manera ilísito i sin instrukshon di e minister anterior di VVRP.

Ademas e eks minister no tabata apoderá na momento ku el a firma e kontrato pa kompra di e edifisio nobo dia 1 di yüli di 2015. Pues sra. Wiels a sera e kontrato di kompra ilegalmente.