WILLEMSTAD.- Kontraloria General di Kòrsou (Algemene Rekenkamer Curaçao) den un karta ku a bai pa presidente di Parlamento a trese un kambio na un frase di e konklushonnan ku nan a emití riba e rapòrt di e estudio ‘Bachelor in Policing’. ARC ta indiká den e karta ku ta trata di un eror den tradukshon di e konklushon di e rapòrt, pero den e rapòrt mes por haña eksaktamente kiko nan a konstatá.

Manera ta konosí a surgi hopi diskushon den tur nivel di komunidat despues ku e konklushon di e rapòrt di ARC a bira konosí. E loke a kousa diskushon grandi ta kaminda e konklushon na papiamentu ta indiká ku Kontraloria General a pidi eks minister di VVRP pa duna prueba ku e no tabata den e reunion di Konseho di Minister ku a trata e proyekto i tambe si e no a partisipá den e toma di desishon. Camelia-Romer ta bisa ku el a manda karta pa bisa ku e no a partisipá den toma di desishon i el a traha un karta den kua el a pidi 4 kolega minister di e tempu aya pa bisa si e tabata den e reunion si of no. Sinembargo den e konklushon di e rapòrt ta indiká ku e otro ministernan den e gabinete no a duna kontesta riba e pregunta di ARC ni maske a puntra nan.

Awor ARC ta trese un kambio den e frase ku ta bisa “Nos no a risibí e deklarashonnan di e sobra kuater ministernan ku a forma parti di e anterior Konseho di Minister, apesar ku a pidi nan esei”, anto a kambia pa “Nos no a risibí deklarashon di e sobra ministernan ku a forma parti di e anterior Konseho di Minister riba nos petishon na e minister anterior di VVRP”.