WILLEMSTAD.-Durante di e pandemia di Covid gobièrnu a habri posibilidat pa duna supsidio na kompania i empresarionan individual pa tene kabes riba awa. A enkargá Stichting Belasting Accountants Bureau (BAB) ku e parti di kontrol. Den trabounan di kontrol ku BAB a konstatá vários puntonan ku no ta korekto, i komo konsekuensia di esei tin kompanianan ku a haña NOW ku mester duna gobièrnu alrededor di 6 mion florin bèk, asina e direktor interino di BAB sr. Isebia a duna di konosé.

E direktor interino di BAB a mustra ku e areglonan manera NOW, TVL i TZBO ta un supsidio i no un fiansa, miéntras ku gobièrnu si mester a hasi fiansa na Ulanda pa por yuda empresarionan mantene kuponan di trabou den e pandemia aki. Tin basta kriterio ku ta usa den kuadro di aprobashon di un petishon si òf no.

Importante ta ku e kompania ku ta pidi un di e supsidionan ta kumpli ku belasting, ta strukturalmente aktivo etc. Di e totalidat di petishonnan ku a yega BAB pa evaluashon i kontrol 12% a haña konseho negativo. Ta bini aserka ku mester 6 mion florin bèk pasobra den kontrol a haña sa ku e kompania no tabatin derecho riba e supsidio ei. 44% di e petishonnan mester a keda ahusta òf tambe rechasá miéntras ku 38% di e petishonnan si ta bon i 18% ta den proseso di kontrol ainda.

BAB a konstatá ku den sierto sektor 25% di kompanianan a deklará ku pèrdida di entrada ku no ta kuadra. E kompanianan aki ta indiká ku nan a pèrdè muchu mas tantu plaka ku realidat. Ademas e pèrdida aki no ta debí na Covid, tin kasonan kaminda e kompania tabatin pèrdida kaba. A konstatá tambe ku tin kompanianan ku a preferá di keda sin habri i kobra NOW.

Serka 18% di esnan ku a hasi petishon BAB a konstatá ku nan riesgo ta haltu den sentido ku nan no ta bai sigui eksistí, pero tòg nan ta pidi NOW. BAB ta rekomendá pa stòp nan NOW.

Otro aspekto ku tambe a resultá for di e investigashon di BAB ta ku e debe di belasting di kompanianan a subi drástikamente. Pues apesar di risibi NOW e debe di belasting di kompanianan a subi di forma dramátiko. Entretantu a rekomendá minister di finansa pa stòp ku pago di voorschot pasobra ta resultá ku mayoria di e kompanianan ei no ta den kondishon di paga bek dado esei resultá nesesario. Mas detaye den edishon di EXTRA.