A bui hefe ku ta insistí ku niun outoridat no por para trabou

WILLEMSTAD.-Outoridatnan polisial huntu ku otro servisionan manera Labor (SOAW), BAB, imigrashon i otronan ta hasiendo un kontrol rutinario na e sitio di konstrukshon di Pen Resort na Pietermaai. Manera a bira un kustumber e tim multidisiplinario ta hasi kontrol riba dokumentunan relevante pero tambe ta chek si tin trahadó ilegal, i si ta kumpli ku leinan laboral na benefisio di e trahadónan. Importante tambe ta pa wak si ta kumpli ku e pago di impuestonan nesesario.

EXTRA a tuma nota ku polis a detené un hefe na e sitio durante di e kontrol. Investigashon di EXTRA ta mustra ku for di momentu ku polis i otro funshonarionan a yega pa hasi e kontrol e hefe aki a keda insistí ku trabou no por para i ku tur trahadó mester sigui traha. Despues di hala su atenshon polisnan a disidí na bui e hòmber aki i awor e mester bai duna kuenta i rason pasobra e ta stroba e trabou di polis i otro funshonarionan di gobièrnu.

Kasi na final di 2023 korte di hustisia a ordená pa stòp trabounan di konstrukshon di e hotèl aki ku mester bira The Pyrmont, debí ku un grupo a entamá un kaso kritikando ku a surpasá e haltura di konstrukshon. Despues minister di VVRP a kambia e pèrmit di konstrukshon dunando outorisashon pa e edifisio por ta mas haltu. Esei a sosodé di manera pa fin di novèmber 2023 e trabounan por a kontinuá. Mas detaye den edishon di EXTRA.