WILLEMSTAD.- Manera a keda indiká den nos edishon di ayera, Djamars último tabatin un kòntròl multi-disiplinario na dos negoshi di outo (nobo i segunda mano) i tambe di piesa pa outo. Ta trata di The New Radiator na Santa Rosaweg i otro na Santo Domingoweg. E akshon a tuma lugá bou di bandera di ACOC, un kombenio di kolaborashon entre partnernan (gubernamental) ku ta atendé ku kriminalidat destabilisante.

Ministerio di Desaroyo Ekonómiko (MEO), Stichting Belasting Accountants Bureau (SBAB), Duana, Ministerio di Desaroyo Social, Labor i Bienestar (SOAW), Banko di Seguro Sosial (SVB), Financial Intelligence Unit Curaçao (FIU, ántes MOT) i Kuerpo Polisial Kòrsou (KPC) a partisipá na e akshon aki.

Ministerio Públiko a splika ku e dia di akshon no tabata dirigí riba supervishon i kontròl so. A duna informashon tokante reglanan ku kompanianan ku ta bende outo mester kumpli kuné na momento ku bende un outo, manera entre otro pèrmit di establesimentu i registrashon serka FIU Kòrsou. ACOC a skohe e sektor di bende outo komo un di e temanan sentral kaminda e kolaborashon ta tuma lugá. Esaki tin di aber ku e sektor aki ta unu vulnerabel. Kriminalnan por usa kompra di outo komo un manera pa laba plaka. Tin otro forma di kriminalidat tambe, manera por ehèmpel benta di outo ilegal, robo di outo, benta di outo hòrtá i modifikashon di number di chasis.

EXTRA kier a aklará ku no nesesariamente paso a bai kontrolá na e negoshi ariba menshoná, ta nifiká ku nan ta okupá nan mes ku labamentu di plaka òf algu otro ku ta robes i kontra lei. Esaki meskos ta konta pa e otro negoshinan ku tambe lo risibí kontrol.

Den e periodo benidero, ACOC lo bishitá mas negoshi den e sektor di benta di outo. E kontrolnan lo ta mas dirigí riba konsientisashon di peliger- i riesgonan ora hasi negoshi ku kriminalnan. Banda di esaki lo duna informashon pa rekonosé señalnan di trámitenan ilegal, manera pago kèsh òf un kliente relativamente hóben ku kier pone e outo na nòmber di un negoshi (estranhero). Krímen destabilisante ta un tema fèrfelu. Mayoria biaha bo no ta mir’é, pero e tei si. Siudadanonan i negoshantenan mester bira mas konsiente pa evitá ku, konsiente òf inkonsientemente, nan ta partisipá na práktikanan kriminal. Akshonnan manera esaki mester kontribuí na e meta aki.