Un dia promé kliente a graba video mustrando produktonan di 2018

 WILLEMSTAD.- Un tim formá pa empleadonan di MEO, BAB, SVB, SOAW  i polis a bai supermerkadonan di e kadena Centrum pa hasi un control rigoroso.  E kaso aki a konosé su orígen un dia promé na momentu ku un kliente a topa ku e.o keshi ku a kaduká for di 2018. E kliente rabia a hasi un grabashon di video i a pone esaki riba ret sosial. E kaso a kousa basta preokupashon den komunidat i sigur konsiderando ku ta trata di un supermerkado hopi konosí.

Awe mainta pues e timnan a yega na e supermerkadonan na Mahaai i Piscadera i para e operashon pa asina por a hasi e trabou di kontròl. E klientenan ku tabata paden a haña chèns di kaba di hasi nan kompra pero no a laga klientenan drenta e establesimentunan. EXTRA ta pendiente di un komentario di e propietario sr. Ribeiro kon a bai ku e kontròl. E tabata okupá i no por a atendé EXTRA ainda.