WILLEMSTAD.- Funshonarionan di e tim multidisiplinario ta hopi preokupá ku komportashon di hóbennan riba kaya i na sitionan públiko. Esaki a konkluí for di kontrolnan ku a keda ehersé wikènt último, na vários sitio.

Hefe di Departamentu di Inspekshon Ekonómiko Ronny Cornelis a indiká na EXTRA, ku generalmente hóbennan no ta tene kuenta mes ku e medidanan di Covid-19. Na vários sitio a mira ku hóbennan ta para aglomerá, grita, bebe i no ta tene kuenta ki rísiko nan i tambe otronan ta kore. Dos di e áreanan ku sigur a tuma nota di aglomerashon, te den oranan grandi di mardugá tabata Palu Blanku i tambe Saliña.

Aparte di esaki, e tim multidisiplinario tabatin basta doló di kabes ku tokamentu di músika duru na sitionan públiko.

Cornelis a indiká ku hendenan ta puntra nan mes kiko tokamentu di músika duru tin di aber ku Covid? E ta splika ku na momentu ku tin músika demasiado duru, hendenan ta bai kuminsá grita i papia mas duru ku otro, ku konsekuensia ku di e forma aki e vírus por keda transmití. Esaki mirando ku hóbennan no ta gusta bisti tapa boka i ménos den públiko òf na sitionan públiko kaminda tin aglomerashon.

Otro problema ku e tim multidisiplinario a konstatá wikènt, ta e fenómeno di “Bottling”. Esaki ta kaminda e.o snek i bar ta ofresé e servisio di yena bòternan di e.o wiski na un preis mas barata. E fenómeno aki tambe por tin efekto riba Covid. Esaki debí ku na momentu ku klientenan haña alkohòl na un preis mas kumbiniente, nan ta bebe mas ku konsekuensia ku ora nan bebe dimas ta kuminsá gritamentu, bailamentu i papiamentu duru, lokual tur tambe por ta e fuente di transmishon. Huntu ku esaki na momentu ku bai yena bòter pa kliente, no sa ku e bòter ta limpi i desinfektá.

Ta basta sitio a keda sera wikènt pa e motibunan aki.