WILLEMSTAD.- Komo parti di e esfuersonan di minister Jesus-Leito i e outoridat di aviashon sivil Kòrsou CCAA pa sòru pa e sistema di aviashon ta mas sigur pa e residentenan di nos pais ku ta usa e tráfiko aéreo diariamente, a realisá inspekshonnan di alkohòl bou di miembronan di tripulashon di buelo di vários kompania di aviashon na airopuerto Hato.

A tuma un total di 17 muestra serka kompanianan di aviashon lokal i internashonal, kaminda a revisá e pilotnan, e personal di mantenementu i  di kabina. E porsentahe a keda bou di e límite pa tur e kontròlnan.

E kontròlnan no  keda anunsiá delantá. Artíkulo 6 di ordenansa nashonal di aviashon di 20 desèmber 2001 ta duna un base pa esaki. Den e promé parti di e reglamentu di aviashon sivil di Kòrsou i e normanan di implementashon asosiá,  ta detayá e realisashon di kontròl di alkohòl. E kontròlnan aki a keda realisá pa CCAA den kolaborashon ku polis di Kòrsou. Fiskal, huntu ku CCAA ta responsabel pa e kontròlnan di alkohòl den e kampo aironóutiko i a partisipá aktivamente den e mantenementu di e kontròl aki.

Di awor padilanti e kontròlnan di alkohòl lo tuma lugá riba un base regular i sin previo aviso. Tur esaki den konteksto di promoshon di seguridat.