WILLENSTAD.- Miéntras ku ABC Busbedrijf ta trahando pa remplasá su flota di konvoi pa konvoinan nobo ku èrko i alabes drecha èrko di 11 konvoi di e flota aktual, ta sigui traha riba medidanan temporal pa duna alivio na tantu trahadónan komo klientenan durante e periodo kalor inmenso ku ta asotá Kòrsou. Den e kuadro aki konvoinan di ABC Busbedrijf lo kuminsá kore ku portanan habrí tambe.

Asina e kompania di transporte públiko ta anunsiá den un partisipashon interno. Komo medida temporal ya kaba konvoinan ta kore ku tur bentana habrí i un fèn pa shofùrnan haña poko airu. Banda di esaki lo kuminsá kore tambe ku portanan di konvoi habrí. Gerensia di ABC Busbedrijf ta bisa sinembargo ku ehekushon di kualke medida mester tuma lugá na un manera kouteloso i responsabel.

For di e análisis profundo ku gerensia a hasi riba e medida di habri porta, a konkluí ku shofùrnan mester manehá ku mas koutela. Banda di esaki shofùrnan mester risibí instrukshonnan spesífiko pa por manehá ku porta habrí. Instrukshon spesífiko pa manehá ku porta habrí ta entre otro ku tur shofùr lo haña di nan “shift supervisor” e instrukshonnan nesesario kon pa manehá konvoi ku porta habrí.

Durante e seshon di informashon lo atendé entre otro e sitionan kaminda ta prohibí pa kore ku porta habrí i demas instrukshon kon ta manehá e konvoi ku porta habrí. E seshonnan aki ta tuma lugá entre 20 i 30 sèptèmber. Gerensia di ABC Busbedrijf a fiha promé di òktober próksimo komo fecha tentativo di implementashon di e medida temporal aki miéntras ku na desèmber 2024 lo evaluá e medidanan.

Otro puntonan ya konosí pa e shofùr ta ku na momento ku desaktivá e sistema pa por kore ku porta habrí, ta eksigí mas tantu ainda ku e shofùr ta mantené su atenshon riba karetera. Ya kaba t’asina ku ta prohibí pa shofùrnan papia na telefòn òf tin “earpeace” bistí na momento ku ta manehá e konvoi. Banda di ta alerta shofùrnan mester manehá e konvoi hopi defensivo i kouteloso pa no okashoná aksidente òf daño pa falta di atenshon.

Ademas di esaki, shofùrnan mester tene kuenta ku e kareteranan na Kòrsou ta smal i tambe por tin vehíkulo stashoná kantu dui kaminda. Esaki ta pone un responsabilidat èkstra riba shofùrnan su komportashon den tráfiko. Gerensia ta hasi un apelashon riba tur shofùr pa tene kuenta ku den kaso ku falta di atenshon di e shofùr ta kousa di un aksidente i/òf daño na terser, por tene e shofùr responsabel pa esaki.

Erko

Turesten ABC Busbedrijf ta spera di pronto por  pone e promé 2 konvoinan den sirkulashon ku tin èrko. A saka 2 konvoi for di sirkulashon pa drecha e èrkonan. E trabounan ta práktikamente kla i unabes ku e konvoinan aki ta den sirkulashon atrobe por saka otro konvoi(nan) pa bai drecha èrko. Ta un total di 11 konvoi ta bin na remarke pa drecha èrko. Tambe gerensia ta trahando duru pa haña 5 konvoi nobo ku èrko den luna di desèmber awor i a hasi petishon na minister enkargá ku Tráfiko i Transporte pa kumpra 10 konvoi mediano mas pa sigui remplasá e flota di ABC Busbedrijf.