WILLEMSTAD.- E siman aki Servisio Meteorológiko Kòrsou tabatin  bishita di koleganan di e instituto di Meteorologia di Colombia (IDEAM) pa un bishita di trabou relashoná ku identifikashon di e gastunan na e sektor di aviashon.

Den kuadro di e MOU, e programa di koperashon Meteorológiko ku a akordá entre Servisio Meteorológiko Kòrsou i Colombia na 2016, empleadonan di IDEAM a hasi un bishita di trabou na Meteo.

E ophetivo di nan bishita ta, pa  konstruí un modelo ku ta adekuá pa e organisashon di IDEAM basá riba e reglanan di e Organisashon Internashonal di Aviashon Sivil (ICAO).

Debí ku Servisio Meteorológiko Kòrsou ya na 2009 a hasi e ehersisio aki, nos a pone nos mes disponibel pa asistí IDEAM den e proseso aki.

E motibu pa esaki ta, ku Servisio Meteorológiko a konstruí e modelo aki den kuadro di e proseso di restrukturashon di Antia Hulandes, pa asina kuantifiká e gastunan  pa e sektor di aviashon riba e diferente islanan.

E modelo eksistente di Servisio Meteorológiko a wòrdu adaptá konhuntamente ku IDEAM.

Esaki tin komo resultado ku e gastunan pa e sektor di aviashon a wòrdu kalkulá pa e pais di Colombia.

E bishita tabata un éksito i nos komo Servisio Meteorológiko Kòrsou ta sumamente kontentu di por a duna un aporte na e koleganan di IDEAM.

...Riba e siguiente imágen por Tuma nota di e siguiente ekspertonan:

sra. Pedzi Girigori De Flores, sr. Alexander Melgarejo Arzuza, sr. Juan Guillermo Hoyos Perez i direktor di servisio meteorológiko Kòrsou sr. Albert Martis...