WILLEMSTAD - E siman aki tur esnan ku di un òf otro forma ta risibí un tipo di yudansa for di Krus Kòrá Kòrsou, lo haña notifikashon ku e proyekto di sosten pa alimento i produktonan di higiena, kordiná pa Krus Kòrá Kòrsou, lo yega na su fin. Rònt mundu Krus Kòrá ta brinda ayudo di emergensia temporal, I komo tal no por sirbi komo un ret di seguridat sosial permanente.
Gobièrnu di Kòrsou mes tin plan pa kordiná e yudansa di alimento aki. Krus Kòrá ta bai focus su atenshon riba otro tipo di yudansa nesesario, manera bakunashon di nos poblashon.
Pues Krus Kòrá ta bai stòp ku e yudansa na tur esnan ku diariamente ta risibi kuminda kayente òf pakete di alimento i produktonan di higiena, meskos tambe esnan ku kada dos siman ta risibi, riba e karchi sosial, un montante depositá pa yuda nan kubri nan nesesidatnan. E esfuerso inkansabel di boluntarionan di Krus Kòrá pa organisá e sosten ku ta brinda na asina tantu hende ta duna resultado:
tur siman ta entregá 250 pakete ku alimento. Den e periodo di mart 2020 te febrüari 2021 a entrega no ménos ku 136.350 plato di kuminda kayente. E karchi sosial ‘e-Karchi’ ta un bon solushon pa 11.870 famia, kada un ku ta konsistí di por lo ménos 3 persona.
Ampliashon sosten
E pandemia di Covid-19 a empeorá situashon sosial den e komunidat aki. Krus Kòrá Kòrsou promé ku Covid-19, ya kaba tabata brinda yudansa na esnan den nesesidat den e sosiedat aki, i p’esei tabata fásil pa amplia i kordiná e yudansa pa un grupo muchu mas grandi di hendenan den nesesidat.
Danki na boluntarionan di Krus Kòrá Kòrsou ku por a harma un operashon asina grandi. Nan ta traha 7x dia pa siman pa garantisá ku esnan den mas nesesidat por risibí e yudansa den forma di pakete di alimento i produktonan di limpiesa. Danki tambe na partnernan ku a yuda di forma formidabel pa kumpli ku mas tantu kaso posibel.
Kiko ta bai pasa?
Pues Krus Kòrá Kòrsou ta stòp ku kordinashon di yudansa alimentisio riba nos isla. Gobièrnu hulandes i di Kòrsou ta den deliberashon konhuntamente pa loke ta trata kontinuashon di e programa di parti di ministerio SOAW. Benifisiadonan den nesesidat di ‘e-Karchi’ pa kubri nesesidat di produktonan alimentisio lo risibi informashon mas despues kon pa registrá.
Krus Kòrá no por kompartí bo informashon personal ku otronan pa e motibu ei kada benefisiario mes ta responsabel pa registrá i entregá su informashon na e organisashon. Komunidat di Kòrsou por sigui konta ku su Krus Kòrá, ku den luna di mei awor ta kumpli su di 90 aniversario. Krus Kòrá Kòrsou ta sigui sirbi komunidat ku e dedikashon i pashon di semper.