WILLEMSTAD – Un kore kore total di parti un grupo di ilegal ku a subi tera na Aruba riba promé dia di aña. Wardakosta na Aruba mester a atendé dos insidente separá ku ilegalnan ku a yega Aruba ayera. Outoridatnan a interseptá dos boto ku a yega na kosta i un total di 23 ilegal a keda detené.  E promé boto a keda detektá djadumingu mainta riba radar den bisindario di Arashi. A enbolbí polis tambe pa nan por atendé ku e parti riba tera. A logra detené dos persona den e boto i seis riba tera. Na mes momentu a nota un di dos boto den serkania di Santo Largo. Na yegada di polis marítimo tabatin solamente un ilegal ku tabata saliendo for di e boto. Mientrastantu helikòpter si a detektá un grupo den mondi nan di mangrove. Nan tabata kanando trankil di nan den e awanan plat. Polis a logra detené 15 persona einan di kual un dama.