WILLEMSTAD – Manera EXTRA a informá awe mainta kaba ku tantu gasolin komo gasoil ta bai subi, awor ta konfirmá ku koriente i awa tambe ta bai subi.  E kálkulo di e tarifa pa awa i elektrisidat tin dos komponente: e tarifa básiko i e klóusula di kombustibel. E klóusula di kombustibel ta konsistí di dos elemento: kompra di koriente i gastunan di kombustibel. E ‘kompra di koriente’ ta basá riba e preis pa e energia ku tersernan ta suministrá, manera energia di bientu, di solo i di CRU. ‘Gastunan di kombustibel’ ta enserá produkshon di energia dor di Aqualectra mes. Sin embargo, kada luna e uso di e diferente medio pa produkshon – e asina yamá ‘meskla di produkshon’ ta varia. P’esei BT&P ta determiná e balor di e klóusula di kombustibel mensualmente basá riba e pronóstiko di Aqualectra, di kiko e meskla di produkshon lo bira, den e kaso aki pa e luna di desèmber. Si un luna despues resultá ku e elemento akí tabata muchu haltu òf muchu abou, ta korigí esaki. Den e kaso akí, ta trata di e luna di òktober.

BT&P ta determiná e tarifa básiko pa tantu awa komo elektrisidat un biaha pa aña. E tarifa akí ta enserá tur otro gastu (fiho) pa e produkshon di awa i elektrisidat i tambe e gastunan pa e distribushon i e entrega di esakinan, manera gastu di personal, di mantenshon, depresiashon, etc.

Ta trata di un subida den tarifa di awa i elektrisidat ku ta prinsipalmente kousá dor di e produkto miksto pronostiká pa produkshon di elektrisidat den desèmber i un subida den e faktor di korekshon di elektrisidat i awa pa e luna di òktober, komo konsekuensia di desviashonnan den e produkto miksto realisá kompará ku e pronóstiko. E último akí a trata prinsipalmente ménos produkshon den òktober dor di parkenan di bientu i e sentral di BOO ku na e momentu akí hustamente tin medionan di produkshon relativamente barata.

Den edishon di EXTRA mayan lo tin mas detaye.