Si presentá hopi kaso diripiente lo eskala pa fase 3

WILLEMSTAD.- Awe djasabra un bia mas dr. Izzy Gerstenbluth a informá ku tin mas kaso nobo di Covid. Di tur e hendenan ku a test a haña 5 kaso nobo i 3 di e kasonan ta relatá ku un hende ku ya kaba a test positivo. Esakinan ta den isolashon, punto importante ta si ku no por a lenk dos kaso na niun otro. Un di e 5 personanan ku a test positivo ta un empleado di hospital CMC i asina ta hiba e total di kasonan na 62 kaso kontando for di mart. Di esaki tin 26 kaso aktivo.

Gerstenbluth a sigui bisa ku for di siman pasá a indiká ku tin kaso ku no por a identifiká di unda el a bini. Tres kos ta importante esei ta detektá, isolá i “contact tracing”. Mester detektá, pa medio di tèstmentu, den e prome sirkulo di hende mas yega. Mester determiná si esnan mas serka di esun infektá, a keda infektá tambe i si ta asina mester isolá nan.

Si hende lokal keda infektá i si no sa e fuente esei por bira un problema pasobra e por sigui kana i infektá mas hende i asina e malesa ta plama den komunidat. Esnan den e prome sirkulo mester tene nan den karentena. Nan no ta malu ainda, pero di despues nan test positivo pa nan no infektá otro hende.

Gerstenbluth a splika e konsepto “close contact”, esei ta e ta hendenan ku tabatin kontako hopi serka pa 15 minüt òf mas, tambe kontakto frekuente i asta kontakto íntimo eseinan ta “close contact”.

Si ora test tur esnan rondó di e kaso primario i resultá ku nan a test negativo anto ta nifiká ku e situashon ta ménos ferfelu. Awendia ta test mas dirèkt ku e chèns pa gara hende ku ta positivo mas tempran, esei ta yuda GMN kontené e brote. E epidemiólogo a splika tambe ku si bini hopi mas kluster, si 10 hende pareu, di kua no por detektá e fuente test positivo, esei si ta bira momentu pa bai fase tres. Na Kòrsou 70% di hendenan positivo ta bou di 45 aña i 90% ta bou di 55ana.

Dr. Jeanne Koeijers, internista i presidente di Outbreak Management Team CMC a splika ku nan tin ku sigui kuida empleadonan ku na nan turno mester kuida pashèntnan di Covid i pashènt di otro malesa. Tin protokòlnan pa atendé Covid, ta dependé loke pasa den mundu. Bèrdat tin un empleado infektá ku Covid i konforme e protokòl di CMC, na momentu ku empleado tin síntoma e ta mèldu i ta test e, a base di resultado ta sigui kana. Departamentu di higiena i Arbo ta hasiendo e investigashonnan nesesario den CMC. Mas detaye den edishon di EXTRA.