DEN HAAG.-Informashon di último ora ta indiká ku Kòrsou a aseptá e proyekto di lei COHO, den su vershon adaptá, kompletu i sin niun kondishon, sin niun reserva. For di Den Haag EXTRA ta haña splikashon ku por a spera e final aki debí ku pa último añanan e premier ulandes Mark Rutte i su minister i òf sekretario di estado ku ta atendé e islanan den Karibe a adoptá tal estilo di traha. Nan sa ku e islanan ta den nesesidat finansiero i ta mara kondishon fuerte kada bia ku e islanan indiká ku nan situashon ta serio. Ta sea e islanan ta bira estilo BES òf mester hala mas leu for di Reino. Buskando mas detaye na Kòrsou EXTRA ta komprondé ku den koalishon e partidonan tin poko diferensia den pensamentu kon pa atendé ku e asuntunan aki.

E website NoticiaCla ta indiká ku sekretario di estado Raymond Knops lo a duna di konosé ku a tuma lugá un reunion urgente di gobièrnu di Kòrsou durante di kua e desishon a kai ku ta aseptá COHO 2.0 kompletu, esta e vershon ku e adaptashonnan. Knops a legumai deklarashon di Silvania na radio i a buska pa tende di premier Pisas pa sa kiko e kabes di gobièrnu di Kòrsou ta pensa. Knops a haña e klaridat di Pisas ku Kòrsou ta bai di akuerdo ku COHO kompletu!

Manera EXTRA a informa mas tempran, Konseho di Minister di Reino a informa ku a skòrs e reunion ku mester a trata COHO 2.0. Knops a indiká ku e deklarashon ku minister di finansa Silvania a hasi na radio na Ulanda a konfundí e asuntu. Knops a sali for di e punto di bista ku Kòrsou ta di akuerdo pasobra su promé minister a bisa ku Kòrsou ta di akuerdo algun siman kaba. Na momentu ku a skòrs e reunion awe mainta a pone ku no a trata e COHO pa Aruba ni Sint Maarten. Di e forma ei tambe ta pone ku e dos otro islanan ta bai pone preshon riba Kòrsou pasobra nan situashon tambe ta primi.