WILLEMSTAD.- Awe a sali e anunsio ofisial! Dia 12 yüli 2019 Gobièrnu di Kòrsou a haña un instrukshon (aanwijzing) debí ku na pareser di Gobièrnu di reino, Kòrsou no a kumpli ku e regla pa tene un presupuesto den balansa i hasi e ahustenan nesesario manera artíkulo 15 di e lei di supervishon finansiero pa Kòrsou i Sint Maarten ta indiká.

Na ougustus 2019 Konseho di Minister di Kòrsou a apelá e desishon di Konseho di Minister di Reino.

Den su reakshon riba e apelashon di Kòrsou, Gobièrnu di Ulanda ta indiká ku a duna Kòrsou un aanwijzing basá riba art. 15 di e Rft (Rijkswet financieel toezicht). A pone komo obligashon pa Gobièrnu di Kòrsou kumpli ku e tarea di kompensá e défisit di añanan 2017 i 2018 ku surplus di e añanan 2020, 2021 i 2022. Tambe a pone komo obligashon ku mester paga e debenan na SVB i APC.

Konforme e lei Rft artíkulo 26 Kòrsou por apelá e desishon di konseho di minister di Reino.

Manera indiká Kòrsou a apelá 23 ougustus 2019 i dia 30 sèptèmber 2019 e sekretario di estado Raymond Knops a kontrarestá e apelashon di Kòrsou. Raad van State a instituí un komishon ku a konta ku e miembronan di Raad van State, Vermeulen(presidente), Schwengle, Comenencia i de Grave ku a skucha e representantenan di Konseho di minister di Kòrsou den persona di E de Lannooy, L. Melfor, E. Martis i I. Schotborgh, ku a haña sosten di abogado van Rijn, i di parti di ministerio di asuntunan interno i relashonnan den reino J. Sverijnen, M. Van Leyenhorts i M. Hagoort

Parti 1   kompensá défisitnan pa un suma di112 mion florin riba gewone dienst di 2019

Parti 2   kompensá défisitnan pa un suma di 169.5 mion florin riba gewone dienst di 2017 i 2018 ku surplus di 2020, 2021 i 2022. Mester redusí gastu i subi entrada pa logra kumpli ku e kondishonnan.

Parti 3: pa 31 desèmber 2022 mester a eliminá e debe na APC i SVB.

Kòrsou di su parti ta atmití ku mester tuma media pa drecha finansa públiko pero ei mes ta rechasá e periodo di tempu ku Ulanda ta eksigí pa tuma e medidanan mustrando ku esaki lo tin konsekuensianan funesto pa Kòrsou ku ya kaba tin un ekonomia ku ta kremp.

Raad van State a tuma na konsiderashon ku Gobièrnu di Kòrsou a firma un akuerdo ku Ulanda den e Akuerdo di Kresementu i 12 yüli 2019. E akuerdo aki hustamente tin komo meta pa logra presupuesto balansa struktural.

Despues di análisis profundo Raad van State ta yega na e konklushon ku e desishon di Kòrsou pa apelá e aanwijzing di Ulanda ta bálido. Na di dos lugá ta disidí ku e parti 1 i parti 2 ta kaduká. E parti 3 di e instrukshon si ta keda vigente, pero mester haña un reformulashon.

E debe di periodo kòrtiku na SVB ta eliminá kompletu kaba i p’esei no tin sentido mas pa e parti aki ta den e instrukshon. E debe di periodo kòrtiku na APC ta spesífikamente relashoná ku e debe di 2017 i 2018 ku a generá debí na atraso den pago.

Raad van State a duna Kòrsou rason den e apelashon kontra e aanwijzing di konseho di minister di Reino. Mas detaye den edishon di EXTRA.