Mientrastantu por sigui papia

WILLEMSTAD.-Tur bista ta dirigí riba resultado di e reunion di Konseho di Minister di Reino ku mester a tuma lugá awe 14 di ougùstùs. Kòrsou, Aruba i Sint Maarten a hasi petishon pa yudansa finansiero mirando e konsekuensianan serio okashoná pa e krísis di Corona. E prome informashon for di Ulanda ta indiká ku Kòrsou a kumpli pa gran parti ku e kondishonnan ku Ulanda a pone komo parti di e di dos tranche. Esaki ta e kondishon pa asina por risibí e di tres tranche di plaka. Diferente sektor den komunidat ta urgí gobièrnu pa bai di akuerdo ku e kondishonnan pa evitá ku  ekonomia di e pais aki ta klap den otro. Di otro banda ta lantando gritunan tambe pa mas protekshon di nos outonomia.

For di Ulanda EXTRA tin informashon ku kumpliendo ku e kondishonnan pa e di dos tranche ta duna espasio pa sigui negoshá, manera premier Rhuggenaath tambe a indiká despues di su bishita relámpago na Ulanda resientemente den kua a amplia riba e situashon di Kòrsou. Den Haag ta bon konsiente ku partido di koalishon MAN no ke tende pa ampliashon di leinan di konsenso di reino, miéntras ku e otro partner di koalishon PAR si no tin muchu problema ku mas lei di konsenso.

Pa loke ta trata e kaso di Aruba, e informashon ta ku e situashon ta mas urgente konsiderando ku situashon finansiero di Aruba ta mas delikado, pero mas ferfelu ta ku no tin un plan B. E kaso di Sint Maarten ta diferente den sentido ku Sint Maarten no a hasi nan hùiswèrk na opinion di gobernashon ulandes. No a kumpli ku e kondishonnan mará na e di dos tranche, miéntras ku e plan ku Sint Maarten a pone riba mesa ta desviá demasiado for di loke Ulanda a proponé i ta spera di logra.