Skucha Larmonie-Cecilia dikon no a informa Parlamento delantá

WILLEMSTAD.-Awe mainta na Hulanda a firma e ‘Onderlinge Regeling’ entre gobièrnu di Hulanda i e paisnan Aruba, Sint Maarten i Kòrsou. E areglo aki ta remplasá e tan diskutí COHO. Premiernan di Aruba, Kòrsou i Sint Maarten a hiba palabra i tambe sekretario di estado Alexandra van Huffelen.

EXTRA a papia ku Ruthmilda Larmonie-Cecilia, vise promé minister i lider di partido Nashonal. Den un promé reakshon sra. Larmonie-Cecilia ta bisa ku e ta kontentu ku e logro aki pasobra e preokupashon di Kòrsou tabata pa keda mantene su outonomia i mantene e direkshon di su gobernashon anto esei a keda lográ den e akuerdo aki.

El a sigui splika u e diskushon den tur huki di Kòrsou tabata e formulashon di e COHO pero tur hende ta di akuerdo ku reformanan ta nesesario na bienestar di pueblo di Kòrsou. E kontenido di e areglo nobo aki ta pa hasi e pais mas resiliente i pa e pueblo di Kòrsou por para riba su propio pianan. PNP hamas lo a bai di akuerdo ku un lei di konsenso ku ta mina e derecho di pueblo di Kòrsou.

E vise promé minister a sigui bisa ku pueblo di Kòrsou ta vota pa e gobièrnu ku e ke pa goberná su pais, anto esei e ta hasié atraves di su derecho di voto. Den e akuerdo mutuo ku a keda firmá awe na Hulanda esei ta keda salbaguardiá. Gobièrnu di Kòrsou ta den ‘driver seat’ pa implementá e reformanan anto Parlamento tin tur outoridat pa yama gobièrnu pa duna kuenta i rason na momentu ku esei ta nesesario.

Pa loke ta e parti di implementashon sra. Larmonie-Cecilia a bisa ku su ministerio mes tin 2 aña kaba ta trahando den estrecho koperashon ku Hulanda, implementando reformanan den kuadro di e pakete di paisnan. Ta un relashon di trabou hopi estrecho ku ta dunando su frutanan. Esei ta demostrá ku debidamente Korsou por saka benefisio di un akuerdo ku Hulanda pa logra adelanto di e pais aki i su pueblo.

Riba e pregunta dikon no a informa Parlamento i komunidat mas tempran Ruthmilda Larmonie-Cecilia a splika ku e areglo mutuo aki ta diferente for di COHO ku tabata un lei di konsenso. Sigui e entrevista pa tur detaye.