Kòrsou, Aruba i Colombia usá komo trampolin pa oro ilegal

WILLEMSTAD, MERKA.- Un artíkulo den prensa na Merka ta menshoná Kòrsou, Aruba i Colombia komo paisnan ku ta keda usá pa kontrabandá oro di Venezuela pa drenta Merka. Esaki ta loke ku a bin dilanti durante di un “Hearing” si supkomité di senado merikano, kaminda senador Rubio a pone énfasis riba e kontrabanda ilegal di oro den Latino Amérika i a konsiderá komo un menasa direkto pa e seguridat nashonal merikano. El a bira pió ku e trafikashon di droga, kaminda por tuma nota ku bion di dòler na balor di e metal presioso esta oro ta drenta Merka via di Miami.

“Tin un kosto humano grandi si nos no kontrolá e problema aki”, asina Rubio a bisa, sitando un kantidat grandi di problema ku e mineria ilegal ta trese kuné entre nan tráfiko di hende, korupshon, enfermedat, venenamentu pa merkurio, kontrabanda di droga, deforestashon generalisá den e mondinan di Amazona i enrikesimentu di e poder di gruponan kriminal i gobièrnunan korupto manera e régimen di Nicolás Maduro na Venezuela, esaki segun prensa na Merka ta bisa.

E konsumidónan merikano ta tumando e oro aki ku masha poko konosementu di unda e ta bin i kende e ta kousa daño. E metal ta keda usá no solamente den hoyerianan pero tambe den produktonan elektróniko manera telefòn selular i tabletnan. Rubio a bisa den su presentashon ku 58% di e oro ku ta drenta Merka ta bin di Latino Amérika i e airopuerto di Miami ku ta esun mas serka di Latino Amérika a keda usá pa hopi tempu komo puerto di oro di e pais.

Rubio den pasado asta a hasi yamada riba presidente Trump pa investigá labamentu di plaka den e merkado di oro.

Rubi tambe a bisa durante di su presentashon ku e ta spera ku un proyekto di lei ku el a spònser ku e demokratnan senador Ron Wyden di Oregon i Sheldon Whgitehouse di Rhode Island por hasi difísil e bida di e komersiantenan di oro ilegal.

Durante di e oudiensia tambe tabatin testimonionan di 5 funshonario di departamento di estado, agensia pa desaroyo internashonal, imigrashon i kontròl di duana i FBI. Kada un a papia riba e efektonan destruktivo i e gran alkansá di e mineria ilegal di oro, poniendo atenshon spesial riba e nashonnan mas riku den oro ki ta Peru, Colombia i Venezuela.

E informashonnan di prensa merikano ta menshoná ku un konsorsio liderá pa presidente venezolano Maduro ta sakeando e industria minera di e pais. E fuentenan ta papia di un operashon ku ta produsí mas di 1.5 mil mion dòler pa aña pa Maduro i su sirkulo di hendenan mas yegá. E fondonan ta krusial pa e régimen di Maduro ku mester mantené e militarnan leal. E oro ilegal aki parse ta keda kontrabandá na Miami atraves di Colombia, Aruba i Kòrsou.

Resientemente dos venezolano a deklará nan mes kulpabel despues di a keda arestá na airopuerto di Fort Lauderdale ku oro ilegal na un balor di 5 mion dòler skondé den un avion privá.

SHARE

LEAVE A REPLY