Soto a midi 30mm di áwaseru awe mainta

WILLEMSTAD.-Na hopi parti di Kòrsou siudadanonan a tende i mira awa di shelu basha ku gran intensidat awe mainta. Segun servisio di Meteo ainda por spera mas awe durante di e dia aki, sigur den oranan di mainta. Meteorólogo Rombley den deklarashon na EXTRA a indiká ku ta normal ku na momentu ku áwaseru ta kai ku e temperatura ta baha mas tantu i ku por sinti ku e tempu ta mas friu. EXTRA a midi temperatura di alrededor di 24 grado den oranan tempran di mainta.

Rombley di su parti a konfirmá ku 08:35 am a midi 24.7 grado na Savonet, lógikamente no ta tur kaminda e temperatura ta meskos. Mainta tempran promé ku solo sali ta e momentu ku Meteo tambe ta midi e temperatura mínimo di dia. Den áreanan unda tin mas moveshon di outo por nota ku e temperatura a subi i yega 27 grado kaba.

Pa loke ta trata e temperatura averahe mínimo ku ta konta pa luna òktober Meteo ta indiká ku esei ta na 26.2 grado. E temperatura averahe ta kalkulá a base di e temperatura tumá for di promé di òktober te ku 31 di òktober. Rombley a duna di konosé ku e temperatura mínimo pa òktober ta 21.9 grado.

Pa loke ta trata áwaseru Meteo ta mustra ku por spera mas awa. Tempu ta keda nublá. Na Banda Bou i partikularmente na Soto a midi 30 mm di awa, loke ta un kantidat bastante. Teniendo kuenta ku e sekura drástiko di último tempunan no ta spera ku e awa di awe lo  kousa molèster pa abitantenan ya ku e tera ta seku i ta chupa e awa mesora.