Kòrsou den kuart final … Danki, Honduras!

...Selebrashon serka hungadónan di Korsou ora ku gol di empate a kai na di 93 minut dje partido di ayera nochi kontra di Jamaica...

WILLEMSTAD.- Angustia den e promé minütnan di wega ayera nochi den Banc of California Stadium na Los Angeles, siguí na final di wega pa un selebrashon eufóriko. Despues atrobe tenshon pa motibu dje siguiente wega i na final den oranan di mardugá ora ku Honduras a gana, selebrashon grandi ku klasifikashon di Kòrsou pa kuart final di Gold Cup 2019.

Kòrsou a saka un empate 1-1 ku Jamaica, loke a duna nos un mitar kurpa den kuart final. Pero ku e resultado ei, Kòrsou a dependé di Honduras pa gana di El Salvador p’asina Kòrsou por ta kompleto den kuart final. Esei ta loke a sosodé ora ku e hondureñonan a golia Salvador ku skor di 4-0.

Hopi angustia promé ku por a selebrá

E promé 15 minütnan dje wega Kòrsou v/s Jamaica tabata unu di angustia pa Kòrsou. Tur kos a parse di ta bai malu, Kòrsou primí den defensa sin por a sali. Tirunan hamaikino un tras di otro, Room ta bolbe salba pero finalmente Shamar Nicholson ta duna Reggae Boyz e bentaha di 1-0.

Despues di esei, no a dura muchu ku Kòrsou a kuminsá hunga na nivel di Jamaica. Kòrsou a krea oportunidatnan, di kua chèns grandi pa Leandro Bacuna na minütnan 74 i 76.

Na momento ku 90 minüt a transkurí i a kuminsá hunga tempu èkstra, e defensa Jurien Gaari ta resultá e salbadó di Kòrsou ku un tiru fuerte pafó di área penal, pasando riba kabes di diferente hungadó i bai resultá den nèt. E selebrashon tabata total, pero no tabata kla. Sontje Hooi a yega hopi serka den último minüt pa duna Kòrsou e viktoria, pero su tiru ta racha pasa pegá ku poste.

Danki, Honduras

Kòrsou ku e empate a yega 4 punto, pareu ku El Salvador. Pero e sentroamerikanonan por a pasa pa kuart final ku djis un empate kontra di Honduras ku a pèrdè su promé dos weganan. E wega no a resultá fásil pa Honduras, ku ta kai ku skor di 4-0. Kada gol tabata un selebrashon pa Kòrsou ku den apénas di dos aparishon den Gold Cup ta pasa pa kuart final.

Ken lo ta e rival?

Sigur den kuart final tin wega djasabra entre Haiti v/s Canada i México v/s Costa Rica.  Awe nochi lo sa kua pais ta bira kontrinkante di Kòrsou. Tin e partido entre Trinidad v/s Guyana i Panamá kontra di USA. For di e dos weganan ei lo surgi e rivalnan di Kòrsou i Jamaica pa djadumingu 30 di yüni.  Kòrsou e dia ei lo hunga 8 or di anochi.

…Jurien Gaari kende a los un tiru fulminante pafó di área penal na di 93 minüt di wega, pa gol di empate ku despues a resultá desisivo pa Kòrsou sigui na bida den Gold Cup…

…E 11 hungadónan ku a start ayera, pará d.r.p.d.: Darryl Lachman, Jurien Gaari, Jafar Arias,, Eloy Room, Cuco Martina. Dilanti: Leandro Bacuna, Michael Maria, Gevaro Nepomuceno, Ayrton Statie, Sontje Hooi, Jarchino Antonia…

…Kiper Eloy Room ta keda e figura grandi pa Kòrsou. Ayera nochi atrobe un tremendo wega di su parti…

…Jafar Arias (d) i Sontje Hooi ta selebrá gol di Kòrsou anotá pa Jurien Gaari, miéntras ku e mediokampista jamaikino Vaughn Watson ta lamentá e gol di empate…

…Leandro Bacuna ta bringa e bala ku e hamaikino Devon Williams. Bacuna tabatin 2 dje diesdos tirunan di Kòrsou riba e arko rival…

SHARE

LEAVE A REPLY