WILLEMSTAD.- Komunidat di Kòrsou a keda di shòk ayera mainta ora a bira konosí ku a enkontrá kuater kurpa di venezolanonan riba baranka na Koral Tabak. Segun investigashon preliminar, un lancha ku ta transportá venezolanonan pa Kòrsou di forma ilegal lo a aksidentá na kosta i di tal manera ku tin hende a hoga, pero tambe otronan ku lo a skapa subi tera bai.

Den oranan trempan di mainta un kantidat grandi di polis i tambe wardakosta a keda dirigí pa Koral Tabak despues di a risibí informashon ku un kantidat di persona indokumentá lo mester tabata subiendo tera.

Tambe personanan den e área a señalá un pikòp sospechoso ku tabata transportá sigur 5 persona for di e área.

Na nan yegada a topa un situashon lamentabel kaminda ku a topa ku kuater kurpa ya sin bida bentá riba tera.

Tres di e kurpanan tabata banda di otro i e di kuater kurpa tabata na un distansia. Ta trata di dos hende homber i dos  hende muhé.

E estado dje kurpanan tabata bastante fresku pues tin indikashon ku e kurpanan no tabatin hopi ora morto òf di algun dia. Pasobra e kurpanan no tabata den estado di deskomposishon.

No masha leu for di e kurpanan a topa ku un kantidat di palu ku probablemente ta prosedente di e boto, hopi jug ku kombustibel (gasolin) i diferente otro artíkulo manera paña i sapatu.

A kuminsá ku un búskeda na e sitio pa mira si ta haña mas hende sea na bida òf morto. E helikòpter di Warda Kosta a bula basta ratu riba e sitio i alrededor pa wak si tin sobrebibiente i/òf kadaver, pero no a topa nada.

Riba òrdu di Fiskal di Ministerio Públiko a konfiská e kurpanan sin bida pa mas investigashon.

Rumornan

Djis despues di e insidente lamentabel aki, diferente rumor a kuminsá sirkulá prinsipalmente for di Venezuela ku ta indiká ku ta un kantidat di 34 persona tabatin abordo di e lancha. Ta trata aki di un grupo di hóben, tur bou di 30 aña, di kual 19 lo a fayesé i sobrá lo a yega tera.

Bosero di Wardakosta sr. Roderick Gouverneur a konfirmá ku te den oranan lat di atardi ainda Wardakosta tabata buska i pa wak si ta logra topa ku mas kurpa pero esaki no tabata e kaso.

Pareu ku esei outoridatnan a logra detené 2 homber na entrada di Koraal Tabak.

E hòmbernan aki tabata kompletamente muhá i pia abou i nan no tabata por a identifiká nan mes. A detené e hòmbernan aki pa wak si nan lo por tin algun laso ku esnan morto ku a haña riba baranka i e lancha.

Tin indikashon ku e grupo aki a sali for di e bario San José de la Costa, Coro, Venezuela.

A base di e notisia aki ku a sirkulá mesora via di medio sosial tantu na Kòrsou komo Venezuela, famianan na Venezuela a bin haña sa kiko a pasa nan sernan kerí. Mesora algun famia di e defuntunan a tuma kontakto ku outoridatnan aki na Kòrsou.

E prosedura ku ta sigui lo tuma kontakto ku konsulado venezolano p’asina por yuda ku e parti di identifikashon dje kurpanan i tambe pa drenta den kontakto ku algun dje famianan, ku na nan turno tin di bin Kòrsou pa rekonosé e kurpa i asina bai ku nan defuntu Venezuela, despues ku outoridatnan lokal duna e kurpa liber.

E tipo di insidente aki a tuma lugá aña pasá na Aruba, kaminda tambe a topa kurpa di kuater hòmber pegá den baranka.

Biahe planiá

Segun personanan yegá na esnan den e lancha a komentá na prensa di Coro, estado Falcon, ku e biahe aki tabata planiá for di 3 luna pasá i ku e biahe lo a kosta 100 dòler. En prinsipio a bisa ku ta 45 hende lo a subi e lancha pa bin Kòrsou. Sinembargo 10 a disidí na último ora ku nan no ta bin mas.