Pa: Rudsel van Lamoen

WILLEMSTAD.- Na momento ku mas ku 10.000 deportista for di 206 diferente pais ta topa otro na e enkuentro deportivo mas grandi di mundu, ku ta Weganan Olímpiko (26 yüli - 10 ougùstùs 2024), un biaha mas mester konstatá i biba ku e doló ku bandera di Kòrsou no ta presente na Paris i ku tur probabilidat e ousensia ei lo sigui ripití kada kuater aña.

Un situashon ku ketu bai hopi hende aki na Kòrsou no ta komprondé i ta hasi preguntanan, inkluso ta hasi komparashon ku otro paisnan ku por ta den e mesun situashon estatal ku nos.

...Atleta Liemarvin Bonevacia (r) i yudoka Reginald de Windt na 2012 a klasifiká pa Weganan di Londres, pero por a hasi e biahe solamente bou dje bandera di I.O.C...

E kontesta ta fásil, na un promé bista: International Olympic Committee (IOC) su statüt (Olympic Chapter) kambiá na 1996 ta stipulá lo siguiente relashoná ku partisipashon na Weganan Olímpiko: “Paisnan independiente, rekonosé pa Nashonnan Uní por tuma parti na e weganan”. Seguidamente ta referí na un eksepshon: “Paisnan no independiente pero kualnan te ku 1996 por a tuma parti na Weganan Olímpiko, ta mantené e posibilidat ei”.

Pa e motibu ei Antia Hulandes a keda ku rekonosimentu olímpiko i Antia Hulandes a tuma parti te ku e weganan di 2008 na Beijing.

Na 2010 Antia Hulandes a stòp di eksistí i a surgi e.o. Kòrsou komo pais outónomo (no independiente) ku a keda forma parti di Reino Hulandes. Ku esei Kòrsou komo un pais no rekonosé pa Nashonnan Uní i ku tampoko tabata rekonosé pa I.O.C. na 1996, no a haña e rekonosimentu olímpiko.

Bishita di presidente di I.O.C., Thomas Bach (3-r), aki na Kòrsou, kompañá pa direktiva di NAOC durante di un bishita serka Gobernador Mr. Goedgedrag. Na man robes ta presidente di NAOC, ing. Junior Millerson (dfm)...

Kòrsou/Antia Hulandes den Weganan Olímpiko:

Tin dos diferente informashon riba wèpsaitnan enkuanto partisipashon di Kòrsou/Antia Hulandes na Weganan Olímpiko. Tin ta referí na Curaçao Association for Physical Education, ku despues di forma ofisial a kambia nòmber di pais for di Curaçao pa Netherlands Antilles, komo esun promé ku a manda atletanan (team di futbòl) na Helsinki 1952, ku hungadónan manera: Wilhelm Canword, Ergilio Hato, Gein Giribaldi, Pedro Matrona i otronan.

Otro vershon ta referí na Komité Olímpiko di Antia Hulandes, ounke ku historia ta indiká ku ta na 1961 a lanta Netherlands Antilles Olympic Committee (NAOC), kontando ku tur seis isla di Antia Hulandes.

Na 1986 a bini un kambio den NAOC, na momento ku Aruba a bandoná e konstelashon antiano i a forma su mes entidat olímpiko ku a haña rekonosimentu di I.O.C.

...E arubiana Nicole Hoevertsz, aktual visepresidente di Komité Olímpiko Internashonal (IOC). Na 1984 komo atleta di natashon sinkronisá el a forma parti dje delegashon di Antia Hulandes pa Weganan Olímpiko di Los Angeles...

Di su parti, NAOC a sigui kubri sinku teritorio di Antia Hulandes.

Na 2010 Antia Hulandes a stòp di eksistí i e teritorio Kòrsou no a haña rekonosimentu olímpiko. Vershon di dirigentenan di NAOC e tempu ei, ku Ing. Junior Millerson (dfm) na timon, a indiká ku tabatin kombersashon ku I.O.C. i ku tabatin e posibilidat ku eks Antia Hulandes lo no a pèrdè e rekonosimentu olímpiko.

Sinembargo, a surgi un situashon kaminda ku Federashon Deporte i Olímpiko Kòrsou (FDOK) a kana un otro ruta, e.o. ku kasonan den Korte na Lausanne, Suisa (sede di I.O.C.), pa Kòrsou keda rekonosé pa I.O.C. E esfuerso aki no a duna resultado positivo i di forma definitivo e relashon entre I.O.C. i Kòrsou a pasa pa historia.

Dos aña despues di 10-10-10, ku ta e fecha riba kua Kòrsou a risibí status nobo komo pais outónomo den Reino, tres atleta di Kòrsou a tuma parti na Weganan Olímpiko di Londres pero bou di bandera olímpiko.

I.O.C. a husga ku una bes e atletanan a klasifiká, no por kita nan derechi pa kompetí na Londres. Pero ku esei mester a tuma lugá bou di bandera di I.O.C. i no bandera di Antia Hulandes/Kòrsou. E atletanan Liemarvin Bonevacia (atletismo), Phillipine van  Aanholt (sailing) i Reginald de Windt (yudo) por a hasi e biahe pa Londres.

E úniko medaya olímpiko

...Jan Boersma (sailing) na 2008 a gana e úniko medaya olímpiko den historia pa Antia Hulandes...

Antia Hulandes a gana un (1) medaya den Weganan Olímpiko i esei tabata den windsurfing ku e hulandes Jan Boersma na Seoul 1988.

Boersma ta di famia hulandes europeo ku tabata biba na Jamaica i for di einan e famia a muda pa Kòrsou tempu ku e deportista tabatin 13 aña di edat. Ounke ku ya e tabata den deporte di bela, aki na Kòrsou el a desaroyá su talento ku yudansa di profeshonalnan estranhero konsiderando ku e deporte akuátiko en kuestion no tabata keda praktiká na nivel haltu aki na Kòrsou.

Binti aña despues di Boersma, tabata Churandy Martina ku lo mester a gana medaya di plata na Beijing. E atleta, sinembargo, a trapa riba linia den e kareda final i despues di krusa ‘finish’ na di dos puesto, a keda despohá dje medaya di plata.

Antia Hulandes te ku Beijing 2008 tabata presente den tur Weganan Olímpiko, ku eksepshon di aña 1980. E aña ei e weganan ku a tuma lugá na Mòsku a konta ku bòikòt internashonal di kantidat grandi di pais pa motibu dje invashon ruso na Afganistan.

Kiko Kòrsou a pèrdè di risibí?

E entidat olímpiko NAOC meskos ku tur pais ku tin rekonosimentu olímpiko di I.O.C., tabata risibí bastante fondo. Esaki tantu pa kontribuí na desaroyo di deporte en general ku un bon aparato olímpiko pa pais, komo tambe via di Olympic Solidarity. Esaki na interes di tantu atleta i dirigentenan, di kua e último grupo aki por partisipá na vários kurso riba nivel internashonal.

Un bon ehèmpel di kontribushon di I.O.C. por keda mirá na St. Maarten. Na aña 2000 orkan a destruí e prinsipal sala di deporte na St. Maarten. NAOC a risibí US$ 45.000 di I.O.C. pa por a drecha e sala.

Una bes Kòrsou no tin rekonosimentu olímpiko, nos deporte no ta risibí ni un depchi di I.O.C.

Enith Brigitha, medayista olímpiko

...Enith Brigitha na edat hóben a bai biba na Hulanda kaminda el a sigui desaroyá komo landadó pa bin gana dos medaya olímpiko...

Pa finalisá, bon pa tene kuenta ku tin un yu di Kòrsou ku a gana medaya olímpiko. E landadó Enith Brigitha (Kòrsou 4-4-1955) kende na edat di 15 aña a muda pa Hulanda, a gana 2 bròns olímpiko na Montreal 1976 riba distansianan di 100 i 200m estilo liber.

Enith a start su karera aki na Kòrsou i e.o. a kompetí den Weganan di Reino i a landa kompetensianan grandi riba laman.

Despues ku e famia a muda pa Hulanda, el a sigui den natashon i a desaroyá pa bira kampion di Hulanda durante di vários aña i 2x a keda premiá komo Deportista Femenino di Aña. El a kosechá numeroso medaya riba nivel europeo i mundial.

Algun aña pasá Enith Brigitha a risibí e honor di keda introdusí den International Swimming Hall of Fame na Fort Lauderdale, USA.

Na Hulanda e tin un estatua den e siudat di Almere i aki na Kòrsou e pisina di S.D.K. a keda batisá komo “Pisina Enith Brigitha” komo rekonosimentu pa su prestashon den deporte di natashon.