EASLEY SC, - Nos hobennan di senior league representando Caribe , djasabra ultimo a titular kampeon Internashonal ganando di Italia ku skor di 9 pa 5. Nos hobennan a sali riba bon pia den e partido aki , konektando di hit di Jamal Zalm kombina ku doblete di Shane Quant i tambe probechando di erornan mental dje intalianonan pa nos por a pone e wega basta habri ya den di 2 ining ku skor di 9 pa 0. Ku e skor aki Manager Nelo Jansen a opta pa trese un kambio riba montikulo pa Shane Quant dje forma ei por a spar Quant pa e partido pa titulo mundial djasabra anochi mes kontra di Merka.

Jeon Martis a tuma e bala i a wanta basta bon riba montikulo aunke e mes a bisa ku e no tabatin e kontrol kompleto riba montikulo, despues di Martis a sigui Etmont Jobs ku a tira te den di 7 ining i faltando un out pa titular kampeon internashonal , Rowentley Windster a bin sera e entrada pa e skor final keda 9 pa 5. Un kantidat di fanatiko ku a biaha ku e selekshon pa apoya e hobennan tabatei i durante henter e partido a apoya nos selekshon pa finalmente nos sali dje porta grandi komo e kampeonnan Internashonal.

Den oranan di djasabra anochi, e selekshon di Korsou ta logra gana di USA East (Delaware) ku skor di 7 pa 2 pa titular kampeon Mundial di Senior League despues di 16 aña. Ultimo biaha ku Korsou a titular kampeon senior League tabata na 2002 bou di maneho entre otro di Payo Faneyte.

Elchero Fransisca a kuminsa riba montikulo pa Korsou i a soporta 2 kareda i 3 hit na man dje merikano kombina ku falta di kontrol riba montikulo pero despues di esei ta sera e porta hermetikamente tirando 5 ining markando sero so riba e borchi pa Merka i tabata nos picher Shane Quant ku a bin dal e porta sera kompletamente pa Korsou representando Caribe a konkista e titulo kampeonil. Pa Korsou 7 kareda 7 hit i 2 eror picher ganado a resulta Elchero Fransisca i Shane Quant a konekta 2 hit den 4 turno na bate. Pa USA East 2 kareda 5 hit i 6 eror .