Kòrsou satisfecho di no a haña instrukshon

DEN HAAG.- E delegashon di gobièrnu di Kòrsou ku ta na Ulanda na e momento aki a tene un presentashon na prensa via di un konferensha via video, despues di a partisipá den reunion di Konseho di Minister di Reino. Premier Rhuggenaath a duna di konosé ku na un enkuentro promé tabata presente su kolega premier Rutte, minister Ollongren i sekretario di estado Knops. Manera ta konosí e konklushon ta ku a wanta e punto di agènda di posibel instrukshon na gobièrnu di Kòrsou i tambe a wanta e petishon di Kòrsou pa apliká artíkulo 25 di e lei di konsenso di reino ku ta trata supervishon finansiero. Rhuggenaath ta satisfecho.

Premier Rhuggenaath a sigui bisa ku den e enkuentronan ku gobernantenan ulandes gobièrnu di Kòrsou a enfatisá e impakto ku un posibel instrukshon lo tin riba funshonamentu engeneral na Kòrsou i naturalmente e impakto riba gobièrnu di Kòrsou. Tabata importante pa e delegashon di Kòrsou, ku ta konsistí di ministernan Suzy Camelia-Römer, Kenneth Gijsbertha i premier Rhuggenaath pa personalmente presentá e posishon di Kòrsou riba un posibel instrukshon.

Despues di e konsulta premier Rhuggenaath a partisipá den e reunion di Konseho di Minister di Reino representando Kòrsou i einan un bia mas e por a presentá e posishon di Kòrsou pa loke ta trata e instrukshon ku ta riba mesa. Tambe e por a amplia riba situashonnan ku a afektá Kòrsou manera e situashon na Venezuela i su impakto riba Kòrsou. Sinembargo a enfatisá ku Kòrsou ke karga su responsabilidat propio, solamente ku mester di tempu pa logra esei.

Manera indiká e instrukshon a keda riba mesa pero a duna espasio. A wanta ámbos punto, tantu e instrukshon komo petishon pa duna tempu pa gobièrnu di Kòrsou por atendé su asuntunan. Den esaki gobièrnu di Ulanda a indiká ku nan lo bai analisá kon nan por duna sosten na Kòrsou, kon pa solushoná su problemanan spesialmente kon pa aktua i atendé e problema finansiero i refuerso na e aparato públiko.

Premier Rhuggenaath a bisa ku Kòrsou ta satisfecho ku e resultado aki i ku a haña dos oportunidat pa splika i defendé nos posishon.

Minister Camelia-Römer a splika ku pa Ulanda e instrukshon ta mas algu tékniko i p’esei Kòrsou a mustra ku pa nos ta trata di un desishon hopi impaktante. Tambe a indiká ku den kaso ku aki tres siman Ulanda disidí na duna Kòrsou un instrukshon tòg, ku Kòrsou lo apelá e desishon aki na Raad van State. Tambe e minister di GMN ta haña ku mester wak e parti di kontenido di instrukshon pasobra e mester ta real. E ta haña importante pa haña fortifikashon di e tres pianan di e strategia di kresementu  ku ta e.o fortifikashon di e aparato gubernamental. Mas fuerte e aparato ta, mas mihó por goberná.

Minister Gijsbertha na su turno a reiterá ku semper e ophetivo ta i ta keda ku gobièrnu semper tin un presupuesto balansa , pero riba un base struktural. Ya kaba ta hopi plaka e gobièrnu aki a saka for di komunidat redusiendo gastunan.