WILLEMSTAD/TILBURG.- Minister di Enseñansa di Kòrsou, Sithree van Heydoorn, djárason 1 di Novèmber a hasi un bishita di trabou na Fontys Hogescholen na Tilburg, Hulanda. “Ku un delegashon basta grandi minister a bishita Fontys  pa konosé Fontys i reforsá e relashonnan pa futuro i koperashon mutuo”, asina periodista Jan Ligthart ta skirbi riba wèpsait di Fontys Hogescholen tokante e bishita di e delegashon.

Durante e enkuentro presidente di Fontys Joep Houterman a splika ku e kantidat apsoluto di estudiante Karibe na total di Fontys no ta hopi grandi. Pero segun Houterman e kantidat aki ta krese.

Hogeschool Rotterdam pa basta aña tabata e instituto di hbo mas popular entre studiante Antiano ku ta deseá di studia na Hulanda. Awor Fontys i Haagse Hogeschool ta e institutonan mas popular pa studiante Karibense. Un di e motibunan, segun Fontys, ta ku nan ta duna mas edukashon na Ingles.

Delegashon di minister Van Heydoorn durante nan bishita a kombersá ku diferente dosentenan, entre otro Kennedy Tielman, un instruktor na instituto di formashon di maestro i tambe yu’i Kòrsou.

A toka hopi tópiko, entre otro problemanan ku studiante Karibe ta enfrentá ora nan ta bai Hulanda. Manera: idioma, pero tambe e diferensianan di kultura, e gran distansia ku nan "kas," i e esfuerso ku alumnonan ta pasa pa hasi un elekshon di estudio korekto.

Pero, segun Ligthart, tambe e hopi kosnan bon a wòrdu palabrá. Un di e kosnan bon ta e programa di maestro ku ocho estudiante for di nan kas na islanan Karibense ta sigui digitalmente na Fontys.

Durante e bishita Minister Sithree van Heydoorn a ekspresá su deseo di intensifiká e kolaborashon ku Fontys.