A’DAM/W’STAD.- Ketu bai Kòrsou ta number unu riba e lista di destinashonnan interkontinental for di Schiphol. Esei di akuerdo ku un informashon for di Amsterdam, Hulanda. Di e 118 destinashonnan interkontinental ku na 2021 a ser kubrí saliendo for di Schiphol, Kòrsou tabata number-1. Segun e informashonnan aki, Boneiru ta okupando e di shete (7) puesto, Aruba di dies (10). Despues di Kòrsou tin Atlanta na di dos lugá i Dubai na di tres.

Aña pasá Schiphol a prosesá un kantidat di 25.5 mion pasahero, ku ta un subida di 22% kompará ku e promé aña di COVID-19. Despues ku den prinsipio di aña 2021 a kita e konseho negativo pa Aruba, Boneiru i Kòrsou, e islanan a ser bishitá dor di muchu mas tantu turista hulandes, kompará ku promé ku e pandemia di Corona a brota.