Tin tur loke ta nesesario, ta e determinashon i kompromiso so falta!

WILLEMSTAD.-Apesar di tur kos Kòrsou tin oportunidatnan grandi i importante ku por nifiká kresementu real pa ekonomia i desaroyo engeneral di e pais aki. Na e konklushon ei mester yega despues di un entrevista ku Giovanni King MBA, miembro di gerensia di Bureau Telecommunicatie & Post. Kòrsou komo hub digital ta un posibilidat hopi real, pasobra tur loke ta nesesario tei presente e úniko ku falta ta determinashon i kompromiso pa logr’e. Na palabra konosedó di e materia sr. King.

Na hopi okashon ta surgi e diskushon den komunidat kiko mester hasi pa logra adelanto signifikativo pa Kòrsou. Tin kompanianan den hospitalidat i otro sektornan ku ta realisando invershonnan kuantioso, sin embargo ta surgi problema pa haña trahadó. Di otro banda tantu den kuido, refinashon di petroli komo enseñansa profeshonalnan ta konsiderando òf ya kaba a bandoná nos isla.

EXTRA a papia ku King riba posibilidatnan pa Kòrsou. Na opinion di e profeshonal Kòrsou por logra bira un tremendo hub digital. Kiko tin mester pa yega einan?

Na promé lugá ta nesesario bon konektividat ku sobra di mundu. E kantidat di kabelnan supmarino ku ta yega nos isla ta mas ku sufisiente. Den nos region, despues di Puerto Rico, ta Kòrsou ta un di islanan ku tin mihó konektividat internashonal!

Na di dos lugá, ta nesesario bon data center. Kòrsou tin un vários, di kua unu ta un tier4 esta ta brinda e mihó seguridat den tur aspekto, asina King ta sigui splika. Na di tres lugá mester tin un bon Internet Exchange i Kòrsou tin un di esnan ku ta manehá mas tantu informashon despues di Puerto Rico.

Na di kuater lugá Kòrsou tin lei pa protehá informashon/dato personal, tambe tin diferente otro lei manera esun di sektor finansiero internashonal ku por hasi uso di dje. Na di sinku lugá Kòrsou tin ‘human capital’ relativamente bon eduká. Ademas e relashon ku Ulanda tambe ta un punto na bentaha di Kòrsou den e totalidat aki.

Den tur análisis serio mester evaluá puntonan positivo na fabor, pero tambe e debilidatnan i asta menasanan; den e kaso spesífiko aki e profeshonal ta menshoná ku Kòrsou tin limitashon. Na e momentunan aki mayoria kabel supmarino ku ta yega Kòrsou ta manehá òf ta keda operá pa FLOW. Pues ta nifiká básikamente ku tin un situashon di monopolio den e área ei. Mas detaye den edishon di EXTRA.