WILLEMSTAD.- Ku gran plaser i satisfakshon Fundashon Derecho Humano Karibense Human Rights Caribbean, a tuma nota dje anunsio hasí pa e Minister di Relashonnan Eksterior di Hulanda den su karta di 13 di febrüari, 2019 pa e Presidente di Tweede Kamer. E anunsio ta referí na e desishon, riba solisitut di presidente interino Juan Guaidó y Estado Unido, pa usa Kòrsou komo un sentro logístiko pa e ayudo humanitario pa Venezuela. Esaki den kuadro dje nesesidatnan humanitario prinsipal na Venezuela. Entre otro den areanan sosial, ekonómiko i humanitario, manera e Minister ta indiká den tantu su karta komo den su kontestanan riba preguntanan relevante di Tweede Kamer.

Human Rights Caribbean ta spera awor ku e funshon tan importante di hub logistiko pa Korsou i e hecho ku gabinete Hulandes ta seriamente preokupá ku e situashon na Venezuela, lo nifiká ku for di aworakí lo pone un fin ne detenshon di refugiadonan Venezolano den baraknan di SDDK. Tambe ku lo stòp di manda bek e Venezolanonan ku a hui nan pais en buska di algu mihó. Nan pais, ku nan a hui debí ne krísis humanitario ku awor a wòrdu rekonosé pa Reino den su totalidat.

Aktualmente ta na Korsou atmiral Craig Faller hefe di Southern Command reuniendo ku diferente instansia. Nashonnan Uni tin henter un tim para na Cucuta Colombia pa drenta Venezuela ku kuminda, remedi i tur tipo di yudansa.  Den e dianan aki e esfera di reunionnan ta kontinua ku diferente di e grandinan merikano.