Update situashon koriente

Último informashon pa loke ta trata e situashon di koriente ta indiká ku un di e sentralnan di mas importante den ret di distribushon di Aqualectra, esun a Nijlweg, tin problema. Aqualectra ta indiká ku ta debí na esaki ku algun bario a pèrdè koriente.

E kompania ta splika ku nan téknikonan ta trahando pa rápidamente restablesé suministro di koriente na e barionan ku ta sin koriente. Ademas e kompania di utilidat ta pidi diskulpa na komunidat pa e inkumbiniensia ku e situashon aki ta kousando.

Kòrsou konfrontando problema ku koriente atrobe

WILLEMSTAD.-Tin indikashon serio ku vários parti di Kòrsou ta konfrontando problema serio ku koriente. EXTRA a haña konfirmashon ku áreanan manera Sta.Maria, Giroutte i Montaña ta entre esnan ku ya kaba a pèrdè koriente. Awe ta otro djaweps ku Kòrsou ta konfrontá problema ku koriente. Ainda no a logra haña komunikashon ku Aqualectra pa tende kiko por ta pasando i kon largu esaki lo por dura. Por sierto ku EXTRA a tuma nota ku e kompania di utilidat a invitá prensa pa un konferensia di prensa basta dia pasa, ku mester tuma lugá awe mèrdia. EXTRA lo informa asina ku tin mas detaye.