WILLEMSTAD.- Na Kòrsou te ainda no a instalá un ‘drive thru’ pa hasi tèst pa COVID-19, manera te eksistí entre otro na Boneiru i Aruba. Epidemiólogo Izzy Gerstenbluth ayera durante konferensia di prensa di Gobièrnu di Kòrsou a splika ku Kòrsou te ainda a skohe pa tèst hende den nan mes kas. ‘Tabata nos strategia pa evitá ku hende ku por ta positivo tin ku sali nan kas. Bo tin síntoma, bo tin ku keda kas. Nos ta bin serka bo pa hasi tèst’, Gerstenbluth a splika. ‘Pasobra nos no ke kore riesgo ku bo ta kontaminá otro hende.’
Kòrsou den e último dianan a haña diferente kasonan lokal di hende ku a tèst positivo. No ta konosí ainda ken ta e fuente di e kontaminashon. Esaki ta nifiká ku segun Gerstenbluth kantidat di hende ku tin ku wòrdu di tèst a oumentá. Gobièrnu ta purba di kontrolá tur hende ku tabata den kontakto ku persona ku a tèst positivo.
Te ainda Kòrsou no mester a tèst asina hopi hende; te ainda mas ku 2200 hende a wòrdu di tèst. ‘Pero awor aki nos tin transmishon lokal. Komo konsekuensia nos ta hasi ‘contact tracing’. Tambe nos ke tèst rondó di hende ku a tèst positivo. Ta nifiká ku tin hopi hende pareu ku bo tin ku tèst. E ta bira mas difísil pa laga hende kore rònt isla pa tèst hopi hende. Pa motibu ku nos tin un kantidat límite di hende ku por tèst. Esaki a bira un problema. Awor aki nos tin e nesesidat pa organis’é otro. Ku ta nifiká ku nos ta laga hende bin, pero bou di sierto kondishon. Nan ta tèst ora nan ta den outo, bisti un masker. Tin hende ku por kore outo nan mes, tin otro hende ku ta sinti den outo I otro hende ta kore. E idea ta pa asina Kòrsou lo tin un ‘test street’ òf ‘drive thru’. Kaminda bo ta yega: Bentana 1 bo ta hasi bo atministrashon. Bentana 2 bo ta hasi bo tèst. Despues bo ta kla I bo ta bai bèk kas.’
Segun Gerstenbluth e ‘drive thru’ ta den preparashon. ’E kaminda ku nos ta pensa pa instalá e ‘drive thru’ ta na GGD mes na Zakito’