Larmonie-Cecilia:

WILLEMSTAD.- Na opinion di lider polítiko di Partido Nashonal di Pueblo (PNP), Ruthmilda Larmonie-Cecilia Kòrsou lo hasi su mes un fabor si yama elekshon for di awor. Esaki mirando ku a detené lider polítiko di KEM, Michelangelo ‘Low’ Martines ku ta sostené gabinete Pisas II.

E lider di PNP ta urgi gobièrnu pa informá komunidat riba kiko ta bai pasa ku no solamente konstelashon di e koalishon, pero tambe ku nombramentu di ministernan nobo den e gabinete i e proseso di screening. Esaki konforme norma i desensia demokrátiko ku mester tin den un pais i pa evitá yen spekulashon. “Mi mes a fungi den pasado komo formadó i mester sali duna klaridat di kon e proseso ta andando”, Larmonie-Cecilia ta deklará.

E ta bisa ku por duna transparensia i splikashon di e proseso di screening sin bai den detaye di e diferente aspektonan di e screening di kandidatonan pa minister. “Na mi opinion miéntras no hasi esaki ta brua e poblashon mas tantu ainda.” E lider di PNP no ta antisipá sinembargo ku denter korto lo tin un splikashon di parti di gabinete Pisas riba kiko ta bai pasa awor i ta kalkulá ku lo dura  sigur 1 siman promé ku duna kualke informashon.

Relashoná ku gritunan ku mester yama un reunion di parlamento pa asina averiguá si gabinete Pisas tin un mayoria ku ta sostené, Larmonie-Cecilia ta bisa ku tur hende sa ku apesar ku Martines lo no por ta presente ku tòg tin un mayoria di 11 parlamentario ku lo duna nan sosten na e gabinete. E sosten di KEM na gabinete Pisas II a bini na momento ku a surgi un kiebro den e koalishon di MFK i PNP. “Universo mes ta revelá tur kos. E detenshon di lider polítiko di partido KEM, ta fèrfelu pa e mes, pa su famia i pa pais”, Larmonie-Cecilia ta bisa.

E detenshon di Martines a bini nèt na momento ku tin hopi diskushon atrobe riba integridat i korupshon. Larmonie-Cecilia ta mustra ku for di Hulanda a lansa e proposishon pa laga Transparency International wak e sistema di integridat i grado di korupshon na Kòrsou. “Nos a sali i bati Hulanda bisando ku nan mester wak nan mes kasonan di integridat i korupshon pa 1 siman despues e kos aki pasa na Kòrsou.”

Personalmente e lider di PNP ta bisa ku e tabata hopi desepshoná ora el a tende tur e diskushonnan relashoná ku e aresto di Martines. “Nos ta no ta papia riba e ‘issue’, pero ta bai bati Hulanda òf otro partido polítiko na lugá di wak e gravedat di e situashon. Ta defendé kosnan robes pa despues haña straño ku muchanan di skol ta bringa òf ku otronan ta wak nos komo un pais di hendenan ladron.”

Esaki segun Larmonie-Cecilia ta pasobra ta aploudí kosnan robes na Kòrsou i e korupshon ku e kosnan robes aki ta trese kuné ta kome pais. “Niun hende no ke karga responsabilidat mas pa aktonan robes kometé”, e lider polítiko ta finalisá bisando.

Foto:

...Ruthmilda Larmonie-Cecilia...