WILLEMSTAD.- Belasting riba weganan di ‘online gambling’ lo por trese por lo ménos 115 mion florin pa aña den kaha di gobièrnu, i asta ku e posibilidat ku esei lo subi te 215 mion florin. Esei di akuerdo ku un proyekto di lei ku a keda entregá na SER pa konseho. Resientemente Konseho Sosial Ekonómiko (SER) a haña e petishon di parti di gobièrnu pa duna su konseho pa loke ta un proyekto di lei weganan di plaka ‘online’, pero tambe a pidi su opinion riba un proyekto di lei pa loke ta belasting riba weganan di plaka.

Ambos lei ta forma parti di e asina yamá pakete di modernisashon pa loke ta areglonan legal riba weganan di plaka, i esaki ta algu ku a start for di 2019 i intenshoná pa mehorá e imágen internashonal di e industria di ‘online gambling’ na Kòrsou (i-Gaming).

E pakete di modernisashon aki ta basá riba hisamentu di e protekshon pa e konsumidó i evitá elementonan kriminal potensial for di i-Gaming ku ta den konkordansia ku liñanan internashonal.

E dos leinan aki lo tin di remplasá e loke tin komo lei di wega di plaka aktualmente. E diferensia di mas grandi entre e dos leinan aki ta ku bou di e régimen nobo Kòrsou mes lo por otorgá pèrmitnan pa i-Gaming i ku lo no tin posibilidat mas pa sup-lisensianan pa portadornan di pèrmit.

Mas aleu ku e dos proyektonan di lei gobièrnu ta boga pa fortifiká e infrastruktura hurídiko i  lo bai tuma over e tareanan, responsabilidat i outoridat di Gaming Control Board (GCB) riba e tereno aki. Tur esakinan lo bai kai bou di maneho di un Curacao Gaming Authority (CGA), ku ta un órgano di maneho independiente. E meta tras di e leinan aki ta pa oumentá entradanan pa gobièrnu. Loke si SER ta haña ta ku Kòrsou pa motibu di su posishon internashonalmente rekonosé i konsolidá komo hurisdikshon den i-Gaming, lo por konta riba un kompensashon akseptabel ku ta bira posibel dor di legislashonnan nobo i ku belasting kompletamente nobo. I den esaki ta importante ku lei i e rekargo ta funshonal den práktika. Esaki mester ser evaluá mas tantu posibel promé ku e lei keda formalisá.

Segun e proyekto di lei, e entradanan kalkulá pa kaha di gobièrnu ta di por lo ménos 115 mion florin den e promé aña, ku e posibilidat pa e alkansá asta 215 mion na aña 2024. Pa loke ta e kalkulashonnan aki si SER ta pidi pa duna un splikashon mas amplio.