WILLEMSTAD.- Kòrsou no tabata na riesgo ayera na momentu ku e barku Braemar a bini aki pa motibu ku niun hende no a baha na tera. Es mas, e tim di GMN ku a bai na bordo dje barku pa tèstnan esnan ku síntomanan sospechoso a subi bon ekipá, a apliká tur kos segun prosedura i regla i di tal manera ku lo no por a baha ku ningun virus. Pues atrobe no tabatin motibu pa pániko. Asina e epidemiólogo Dr. Izzy Gerstenbluth a duna di konosé den un konferensia di prensa ayera mèrdia. T’asina ku e barku ariba menshoná tabata di bishita aki na Kòrsou, pero ku un kantidat di hende na bordo ku síntomanan sospechoso.

Dr. Gerstenbluth a splika ku direkshon di e krusero aki ku tabata den nos region i planiá kaba pa bin Kòrsou i nan a pidi Kòrsou si tin e fasilidatnan pa por tèst algun persona i nos a bai di akuerdo pa ofresé e servisio ei. A puntra nan pa mas sigur ta dikon nan kier a hasi tèst, ku ta un sistema standart ku ta ser apliká pa sa mas detaye. Tur esaki a ser hasí di akuerdo ku e palabrashonnan i protokòlnan di e Deklarashonnan Médiko Internashonal di Salú.

Kiko a sosodé?

Segun Gerstenbluth, t’asina ku tabatin un pasahero riba e krusero aki i despues ku el a baha a bin resultá ku e tabatin COVID-19. Tin un miembro dje tripulashon ku tabatin kontakto ku e persona ei, loke a pone ku a isolá e tripulante ei mesora. I algun dia despues e tambe a bira malu a base di e mesun síntomanan dje malesa. Awor dor ku ta riba un barku, e chèns pa infektá otro hende ta hopi grandi. Pues ku rason tabatin preokupashon i nan a pidi ku mester tèst.

Den e kaso aki mester a tene kuenta ku aspektonan humanitario i na mes momentu sòru pa nos poblashon ta ‘safe’. Mester a hasi un ke otro di tal manera ku ta salvaguardiá nos poblashon i sòru pa e virus COVID-19 no ta drenta. P’esei tabata importante pa sa si tabatin presensia di e virus riba e barku òf no.

Pero despues di e promé kaso aki a bin resultá ku tin mas tripulante ku síntoma. Pues mester a asumí ku lo por tin mas kaso. Na bordo direkshon di e barku mes a hasi nan propio investigashon i a resultá ku tin un kantidat di pasahero ku síntomanan sospechoso. En total tabatin 7 hende malu.

Segun Dr. Gerstenbluth, a apliká e mesun reglanan ku ta apliká tur kaminda, inklusive na Kòrsou. GMN a subi ku un grupo di 3 hende, Dr. Gerstenbluth, Dr. Joe Alcala, i un kolaborador kende ta esun ku a kue muestra di e personanan pa por tèst despues den laboratorio. E persona aki tabata ekipá ku brel spesial, mondkapje spesial, hantskun spesial i un trahe spesial.

Es mas, e echo ku no a permití ningun hende baha for di e barku i no a permití niun hende pa subi tampoko ta pone ku Kòrsou no tabata na riesgo.