W'STAD/ST. GEORGE'S.- Ku un seremonia kòrtiku ku a tuma lugá na Grenada a duna inisio djadumingu na e di 47 reunion regular di e konferensia di hefenan di estado di Caricom. Promé minister di Kòrsou, Gilmar ‘Pik’ Pisas tambe tabata presente na e reunion pa asina firma e dokumentonan ofisial pa Kòrsou bira miembro asosiá di Caricom.

Esaki a tuma lugá den un akto ofisial di firmamentu despues di e seremonia di apertura. E reunion a marka tambe inisio di e temporada di e presidente nobo di Caricom ku ta e promé minister di Grenada, Dickon Mitchell ku tambe a firma e dokumentonan pa aseotashon di Kòrsou komo miembro asosiá.

E seremonia inougural pa marka inisio di e reunionnan tabata unu spesial. No solamente ta selebrá ku e aña aki Caricom ta eksistí 50 aña, pero Grenada tambe ta selebrá su aniversario di oro komo pais independiente pa 50 aña kaba.

Pa selebrá esakinan a kambia nòmber di e Rotònde Trueblue den Rotònde Caricom. Despues di a hasi desvelo di e bòrchi ku nòmber nobo di e rotònde, pero tambe desvelo di e monumentonan riba e rotònde ku nòmber di tur e pais miembro di Caricom, e aktonan ofisial di inisio di e seremonia a kulminá ku ponementu di bandera di tur pais ku ta partisipá na e reunion.

Djaluna 29 yüli e hefenan di estado lo reuní na Radisson Grenada Beach Resort na Grand Anse ku ta histórikamente signifikante pasobra ta einan a firma e “Grand Anse Decleration and Work Programme”, durante e di 10 konferensia di hefenan di estado di Caricom na 1989. E deklarashon tabata pa engrandesé koperashon ekonómiko i polítiko entre paisnan miembro di Caricom ku énfasis riba rèspèt pa soberania i prinsipionan di igualdat.

Djamars 30 yüli e reunion di hefenan di estado di Caricom ta terminá ku un konferensia di prensa. E reunion a tuma lugá 4 siman mas lat ku a plania debí na orkan Beryl ku algun siman pasá a pasa den region di Karibe.

4 di yüni e hefenan di Gobièrnu di paisnan den Caricom a aprobá e aplikashon di Gobièrnu di Kòrsou pa bira miembro asosiá di Caricom. Esaki a tuma lugá despues ku e tim negoshadó di Kòrsou i e sekretariado di Caricom a terminá e negosiashonnan riba e tratado di atmishon pa Kòrsou. Na e momentunan aki Caricom ta konsistí di 20 pais, di kual 15 ta miembro i 5 ta miembro asosiá.

Kòrsou lo bira pues e di 6 miembro asosiá di Caricom. Komo miembro asosiá di Caricom Kòrsou lo partisipá den e desaroyo di e komunidat Karibense i lo tin diferente benefisio den forma di kolaborashon i integrashon regional riba diferente terenonan kaminda tin interes komun, gobièrnu a informá resientemente.

Esakinan ta enserá aktividatnan ekonómiko, seguridat regional, proyektonan riba tereno di medio ambiente i desaroyo sosial-kultural.

Foto:

...Momento ku promé minister di Kòrsou, Gilmar ‘Pik’ Pisas ta firma e dokumentonan pa Kòrsou bira miembro asosiá di Caricom...