Tur bombero na ABVO pa reunion informativo

WILLEMSTAD.-Na sede di ABVO tin un reunion na e momentunan aki kaminda bomberonan ta partisipando na un reunion di informashon. Dirigentenan di ABVO ta splika EXTRA ku tin preokupashon pa basta tempu kaba bou di e trahadónan i komo sindikato responsabel a yama e trahadónan pa un enkuentro di informashon.

Echo ta ku tur bombero, tantu esnan na warda komo esnan liber a bai sede di ABVO loke ta nifiká ku no tin bombero na kazèrnenan di brantwer pa dado kaso mester duna asistensia. Riba e parti ei e dirigentenan di ABVO a indiká ku ta gerensia di brantwer mes a disidí ku e bomberonan mester laga vehíkulonan di trabou keda na kazèrne pues nan a bai ABVO ku nan propio outo. Esei ta nifiká ku den kaso ku algu sosodé e bombero lo mester bai su kazèrne pa kue e vehíkulo di trabou pa despues bai duna asistensia.

Un di e problemanan ku e trahadónan tin ta e echo ku no tin sufisiente trahadó, esei ta pone ku asina un hende bira malu mesora tur kos ta pega. Un otro situashon fèrfelu ta ku apesar di hopi papiamentu tòg no ta paga e trahadónan ora nan traha riba Pasku di Resurekshon. Mas detaye den edishon di EXTRA.