WILLEMSTAD.- Minister di Hustisia Quincy Girigorie djamars último durante konferensia di prensa di gobièrnu di Kòrsou a bisa ku hopi bia na Kòrsou nos no ta para ketu na sifranan internashonal. Den un presentashon pa Ofisina di turismo di Kòrsou Girigorie resientemente a enfatisá ku Kòrsou ta un pais hopi seif, si bo ta kompará e sifranan di kriminalidat ku otro pais den region. ‘Segun análisis internashonal Kòrsou ta den e top-3 di paisnan mas sigur den Karibe. Nos no ta tuma nota di esaki, nos no ta para ketu riba esaki. Ta parti di nos fayonan den propagá nos pais. Pasobra nos ta un di e paisnan mas sigur den Karibe i Sentro Amérika.’
Girigorie a splika ku esaki ta basa riba sifranan di 2018 i 2019. Sifranan di 2020 ta hopi abou, pero esaki tambe ta konsekuensia di pandemia di Corona. ‘Nos posishon komo un di e paisnan mas sigur den Karibe ta basá riba sifranan di diferente aña.’
Na mesun momentu Girigorie ta splika ku kriminalidat na Kòrsou ta molestiá nos kada dia. ‘Mi ta masha habrí riba esaki.
Pero na otro banda mi a bisa Ofisina di turismo ku nos mester duna mas atenshon na esaki. Propagá nos manera nos ta.’ Girigorie a bisa ku tur hende por wak riba Google ku un di e paisnan den Karibe ku ta hopi abou riba tur lista di paisnan safe ta Barbados. Barbados su tasa di asesinato ta tres bia di nos na Kòrsou, Girigorie a bisa.
‘Ora nos ta papia di seguridat, nos ta hopi mas sigur ku un isla manera Barbados. Ku ta un isla ku tin un grandura ku ta komparabel ku nos tambe komo tal.’
Segun Girigorie esaki ta konta tambe pa paisnan ku ta rondó di Kòrsou. Banda di esei Girigorie a bisa ku den aña 2020 tabatin un bahada grandi riba tur e diferente forma di kriminalidat. ‘Un bahada entre 40 i 60 porshento.’ Girigorie ta konvensí ku Kòrsou por sigui mantené e sifranan di kriminalidat hopi abou. ‘I ku esaki mantené Kòrsou komo un di e islanan mas sigur den Karibe.’