WILLEMSTAD.- Siman pasá a kuminsá grabashon pa un pelíkula di Sinterklaas na Kòrsou. Asina Yvonne van Schaijk ta skirbi pa wèpsait curacao.nu. E pelíkula yama ‘Sint Ahoy’. E pelíkula lo ta den diferente sine na Hulanda for di 4 di òktober di e aña aki. Ta trata di un pelíkula hulandes di direktor- i produktornan Rik Sinkeldam i Andy van Veen. Djadumingu 16 di aprel tabata e ultimo dia di grabashon na Kòrsou. Mayoria sitio pa e pelíkula tabata kompletamente será pa públiko. A hasi grabashon na entre otro Caracasbaai, Mangrove Beach Corendon, Livingtsone, Jan Thiel Beach, brùg di ponton Emma i Sandals Royal Curacao. Den e ultimo lokashon a graba tambe un barku ku pirata.

E pelíkula ta tokante Sinterklaas ku ta bishitá Kòrsou huntu ku su Pietnan. Na Kòrsou nan tin un konfrontashon ku piratanan.

Den e artíkulo ta skirbi ku diferente yu’i Kòrsou tin un ròl den e pelíkula, manera aktris Channa Koerten (ku ta konosí for di seri ‘Echte Meisjes in de Jungle’ i ‘Tempation Island’). Tambe Melissa van Veen, ku ta un ‘influencer’, tin un ròl den e pelíkula. Otro aktornan den e pelíkula ta entre otro Gover Meit, ku pa basta aña tabata konosí bou di nòmber artístiko Stefano Keizers. Tata di Gover Meit a nase na Kòrsou. Un otro aktor den e pelíkula ta Jérémie Vrielynck, ku ta un artista for di Bèlgika.

Den e artíkulo ta bisa ku e Pietnan no ta pinta pretu òf un otro koló. Tur Piet tin nan mes kolódi kueru.

Segun e direktornan nan ke keda leu for di diskushon tokante ‘Zwarte Piet’. Segun nan fiesta di Sinterklaas mester ta habrí pa tur persona. Pa e motibunan ei no ta usa e figura di Zwarte Piet den Sint Ahoy.