WILLEMSTAD.- ‘Aparte di e training ku nos a duna na tur hende den e trayekto di bakunashon, nos a kuminsá tambe pa hasi simulashonnan.’ Asina epidemiólogo dr. Iralice Jansen a bisa djaweps último durante konferensia di prensa di gobièrnu di Kòrsou tokante ‘Komienso di bakunashon na Kòrsou’. Jansen a splika ku ‘bo tin ku keda praktiká, pasobra bo ke ora e kos aki ta kuminsá bo mester ta hopi bon prepará.’ Jansen a splika ku durante periodo di simulashon a bin ku kasonan inesperá pa wak kon e hende ku ta enbolbí den e trayekto di bakunashon ta ‘dil’ ku esaki.
Jansen a splika ku entrante 24 di febrüari ta kuminsá ofisial ku programa di bakunashon pa komunidat di Kòrsou. Ta bai bakuná 7 dia pa siman, di 8.30 or di mainta pa 5.30 or di atardi. Jansen tambe a splika ken ta risibí bakuná promé. Ku ta tur persona di 60+ aña i personal di kuido ku ta traha direktamente ku pashènt. Nan ta e proménan ku ta bin na remarke pa haña e bakunashon.
Personanan ku e siguiente kondishonnan tambe por haña e bakuna: Asma, Diabetes, Obesidat, Preshon haltu, Malesanan króniko, Pashèntnan ku ta dialisá, ku tin problema ku kolesteròl i ta bebe remedi pa hasi sanger delegá; ku ta ‘antistolling medicatie’. Segun Jansen pa tur di e hendenan aki e bakuna ta “safe” pa nan. ‘El a wòrdu di tèst i el a wòrdu probá.’
Tambe tin un grupo ku no ta bin na remarke pa haña bakuna pa loke ta trata COVID-19, Jansen a splika. Ta e personanan ku ta bou di 18 aña. ‘Manera minister a indiká, nos ta bai bakuná 18 aña bai ariba. Hende muhé ku ta na estado tampoko no ta bin na remarke di bakunashon. Si mi tin ku bisa ku tin kasonan spesífiko, kaminda hende muhé ku ta na estado, dor ku nan tin hopi riesgo pa COVID-19 i e por haña malesa severo dor di Covid-19. Huntu ku su dòkter di kas – òf huntu ku si ginekólogo – nan por yega na algu. Di mes tambe persona ku tin alergia severo pa un komponente ku ta den e bakuna, no por risibí e bakuna aki. Jansen a bisa ku ‘Semper en kuando bo ta duda òf bo tin pregunta, bishitá e wèpsait www.bakuna.cw òf tuma kontakto ku bo dòkter di kas.’
Bakunashon lo tuma lugá na Sehos. Tin dos lokalidat diferente na Sehos. Un ta na Poli di ántes ku entrada di Breedestraat. E otro lokalidat ta na St. Anna Paviljoen, ku tin su entrada na Pater Eeuwensweg. Tin trayekto separá pa hende indokumentá. Nan lo wòrdu bakuná na un lokalidat designá pa hende indokumentá. Klientenan den kasnan di kuido, lo haña bishita den nan mes kas di kuido.