WILLEMSTAD.- E di 41 edishon di My Guardian Group Walk & Run a reuní un kantidat rèkert di partisipante bou di e tema “My Health, My Wealth”. E evento a trese huntu deportistanan lokal i internashonal pa un mainta yen di movementu, salú i inklushon.

Ku e evento anual aki, Guardian Group Fatum un biaha mas ta pone énfasis riba su kompromiso pa stimulá un estilo di bida salú i fortalesé komunidat di Kòrsou. E tema Mi Salú, Mi Rikesa,  ta rekordá e partisipantenan ku invertí den nan salú ta un di e invershonnan di mas balioso ku nan por hasi.

Tambe e ganadonan “overall” di e diferente edishonnan di My Guardian Group Walk & Run rònt di e islanan di Karibe Hulandes a bini huntu Kòrsou djadumingu último pa partisipá na My Guardian Group Walk & Run Kòrsou. E ganadonan “overall” a representá nan isla durante e edishon aki.

Den e kompetensia di 10 km, Dy-Onn Courtar di Aruba a gana den kategoria maskulino ku un tempu di 35:54 minüt, miéntras ku Nolwenn Rousseau di Sint Maarten a triunfá serka e damanan ku un tempu di 44:12 minüt.

E ruta nobo di 5 km, introdusí pa promé biaha e aña aki, a mira Shawn Tromp di Aruba gana den kategoria maskulino ku un tempu di 20:15 minüt. Tromp a logra e prestashon speshal aki, miéntras ku e tabata pusha un atleta hóben den ròlstul. Serka e damanan, Lisa Brantenaar a gana ku un tempu di 23:27 minüt.

E aña aki, The Glory Runners, un grupo di atletismo pa hóbennan, a risibí un donashon pa stimulá deportistanan hóben pa sigui praktiká deporte, move huntu i desaroyá un estilo di bida salú.

Ademas, e aña aki, pa promé biaha i den kolaborashon ku F4RWRD RNG Club, a introdusí un ruta speshal di 5 km pa hendenan ku ta kore. Den kuadro di e edishon nobo aki di My Guardian Group Walk & Run, F4RWRD RNG Club tambe a risibí un donashon.

Rode Kruis tambe a risibí un donashon e aña aki. Ya pa 41 aña, e organisashon ta involukrá ku My Guardian Group Walk & Run, ku nan team presente riba e ruta pa brinda sosten médiko i kontribuí na bienestar di e partisipantenan. Ku e donashon aki, Guardian Group Fatum ta ekspresá su apresio pa Rode Kruis involukrashon i sosten durante tur e añanan aki.

Guardian Group ta yama danki na tur ku a yuda kontribuí na e eksitoso evento.