WILLEMSTAD.- Ministerio di Hustisia djadumingu último a duna di konosé ku lo kreá un sentro di akohida pa hende indokumentá na Kòrsou. E sentro lo keda konstruí riba tereno di SDKK. E ta bin na e lugá na unda awor ta e baraknan pa estranhero.
E sentro di akohida lo ta bou di dominio di sentro di prisòn SDKK den koperashon ku polis di Kòrsou. E Sentro lo tin kapasidat pa 70 persona, 35 hende muhé i 35 hende hòmber.
Motibu pa konstrukshon di e sentro nobo ta e problemanan aktual na Venezuela, ku tin te ainda ku hopi venezolano ta purba di yega Kòrsou na un manera ilegal, entre otro via boto. Tambe regularmente ta arestá venezolanonan indokumentá ku ta riba nos isla kaba.
E proyekto pa yega na un sentro di akohida nobo lo wòrdu kordiná for di ministerio di Hustisia na Kòrsou den koperashon ku ministerio di Asuntunan Interino i Relashonnan di Reino (BZK) di Hulanda, SDKK i ‘Dienst Justitiële Inrichting’ (DJI).
E sentro di akohida lo kuadra ku reglanan internashonal. Ku ta nifiká ku indokumentadonan por haña aktividatnan diario i tambe lo tin personal adekuá i kuido médiko.
Banda di esei lo tin, entre otro, sala di rekreashon, un biblioteka, kamber bishita i tereno deportivo. E sentro pa hende hòmber lo wòrdu konstruí apart for di e sentro di hende muhé.
E proyekto lo wòrdu finansiá dor di ministerio di BZK. Pais Kòrsou lo paga pa e kostonan di eksplotashon. Segun e komunikado di minister di Hustisia lo kuminsá buska personal nobo, manera hende ku ta traha den seguridat i tambe enfermeronan.
Tambe ministerio di Hustisia a bisa ku e personal ku awor ta traha ku e hendenan indokumentá lo haña un trayekto di training ‘online’. Esaki lo wòrdu organisá dor di DJI i finansiá dor di ministerio di BZK.
Ta spera ku e sentro di akohida nobo lo ta kla den luna di Mart 2022. Segun ministerio di Hustisia ta spera ku den luna di Aprel 2022 e sentro por ta kla pa funshoná.