Ruthmilda Larmonie-Cicilia no tin tempu pa pèrdè:

WILLEMSTAD. - Lider polítiko di Partido Nashonal di Pueblo (PNP) a gradisí e tim negoshadó pa e promé fase aki i di manera ku por a yega na un repartishon di ministerio. Ta trata di un desaroyo ku a kana lihé i apénas un siman despues di e resultado di elekshon.

Na e momentunan aki Kòrsou ta pasando den un krísis hopi profundo. Ta nifiká ku awor aki no tin tempu pa tuma hopi espasio. Awor aki ta bai traha sin pousa.

Tur dos partido ta konsiente ku e kousa ta pais Kòrsou i p’esei mas lihé mester forma e gobièrnu i mas lihé mester kuminsá traha.

PNP a hiba un kampaña dirigí riba e pueblo di Kòrsou i esaki ta nifiká ku lo pone hopi atenshon riba e desaroyo di e yu di Kòrsou i lo traha duru riba e aspekto sosial di e pueblo.

P’esei lo bai duna hopi atenshon i asina duna e pueblo tambe partisipashon i lo traha transparente di manera e pueblo sa unda e ta bai.

Un aspekto mas ku lo pone atenshon ta e gastunan haltu di hür edifisio pa ofisinanan di gobièrnu. Mester pone un fin na esaki i yega na un edifisio sentral pa tur ministerio.