WILLEMSTAD.- Di akuerdo ku minister Javier Silvania komo minister di Finansa i Salú di Kòrsou, e ta rekonosé e importansia krítiko di e enkuentro aki, esta e di 17 konferensia “International Law Enforcement Intellectual Property Crime Conference”. Minister Silvania a bisa ku Krímen riba Propiedat Intelectual (IP), apesar di su naturalesa global, ta pone reto signifikativo pa tur pais, spesialmente pa paisnan chikí manera Kòrsou. E kompleksidat di krímen IP ta pone un preshon grandi riba outoridatnan di Duana, ku ta na e “promé liña” pa protekshon di “nos” frontera.
Pa paisnan chikí manera Kòrsou, manehá e subida di produkto falsifiká i krímen relashoná ku IP ta un desafio mayó. E ofisialnan di Duana ta enfrentá un preshon kresiente debí na e kantidat di produkto ku ta pasa dor di “nos” puertonan i kon sofistiká e ret di krímen a krese bira. E impakto di esnan aki ta bai mas ayá di pèrdidanan ekonómiko, sino tambe ta pone un menasa riba salú públiko, seguridat i medioambiente.
Un tendensia preokupante ta e oumento di krímen IP den e sektor médiko. E proliferashon farmaseutiko falsifiká i aparato médiko ta pone un menasa dirèkt i peligroso pa komunidat. Esaki no ta solamente un asuntu di pèrdida finansiero; e por trata di bida o morto. Enfrentá ku e asuntu aki ta rekerí mas ku solamente vigilansia na frontera, e ta rekerí kolaborashon fuerte entre Duana, Inspekshon di Salú, i otro entidat regulatorio lokal pa prevení ku e produkto peligroso aki yega na siudadanonan.
Pa kombatí esnan aki, kolaborashon internashonal ta esensial. Segun minister Silvania mester traha huntu ku partnernan global i regional pa kompartí inteligensia, strategianan di reforsamentu. Igualmente importante ta kontinuidat ku kapasidatnan di desaroyo pa entidatnan di lei lokal. E ofisialnan di Duana, reguladornan di salú, i otro entidatnan mester wòrdu ekipá ku e mihó hèrmèntnan i konosementu pa adelantá krímen sofistiká.
E konferensia ta yega den un momentu krítiko. Kòrsou, manera hopi otro paisnan, ta prepará pa enfrentá e retonan kresiente di krímen IP. E evento aki ta duna un plataforma balioso pa kambia ideanan, kompartí mihó práktikanan, i haña solushon pa protehá komunidat. “Tur hende por ta sigur ku nos ta determiná pa dediká e rekursonan nesesario pa e kousa aki. Laga nos usa e oportunidat aki pa fortifiká nos determinashon, konstruí ku partnernan, i intensifiká nos abilidat pa protehá salú, seguridat, i bienestar ekonómiko di nos siudadanonan”, minister Silvania a terminá bisando.