WILLEMSTAD.- Por bisa ku Kòrsou riba e bon direkshon pa loke ta turismo, nos ta “right on track” pa alkansá e metanan stipulá pa 2023. Esei por a komprondé for di un presentashon di sr. Sem Ayoubi, Senior Business Development Manager na CPA durante un enkuentro ku prensa pa kompartí desaroyonan den turismo. For di komienso di aña CPA huntu ku otro aktornan den e sektor aki a proyektá komo meta pa alkansá 700.000 alma ku ta bini riba barku, i pa fin di luna di sèptèmber ya a yega 491.000, ku e posibilidat asta pa surpasá esaki.

Segun sr. Ayoubi, den e último añanan pa loke ta yega di barkunan i tambe e kantidat di pasahero ta normalisando i stabilisando si tin di kompará esaki ku añanan anterior. Si mester analisá e sifranan di yanüari te ku sèptèmber 2023 pa loke ta e kantidat di yega di barku i e kantidat di turista ku nan a transportá. Por papia di un promedio di okupashon di 85%. Es mas, den e mesun periodo aki  na 2022 a bini 351.000 turista krusero, i awor ta papia di 491.000.

Un otro desaroyo positivo ta ku, awor tin mas liña di barku ku ta optando pa bishitá Kòrsou. Nan ta inkluí Kòrsou den nan itinerario i nan ta karga kantidat grandi di pasahero. Den esaki sr. Ayoubi a menshoná p.e. un Norwegan Cruise Line ku kapasidat di mas ku 5 mil persona; tambe Carnival i Royal Caribbean ku tin barkunan ku kapasidat pa mas ku 6 mil hende. Tur esakinan ta yuda den e kantidat total. Den e periodo te ku sèptèmber tabatin te awor 191 barku ku a bishitá Kòrsou, ku a transportá e 491 mil turistanan. Esaki ta un subida di 56% kompará ku aña 2022 den e mesun periodo. Ainda no a alkansá e nivel di 2019 ku tabata di 541 mil den e mesun periodo.

Segun Ayoubi, for di otro luna por konsiderá ku ofisialmente e temporada haltu di turismo ta drenta na vigor den su forma kompleto, i ku esei por asumí ku nos haf lo bai tin bishita di hopi barku atrobe. E proyekshon total pa 2023 te ku desèmber ta ku nos lo haña bishita di 295 barku, ku finalmente lo trese 710 mil pasahero. Esei ta nifiká ku Kòrsou lo alkansá su meta di 700 mil òf mas pa 2023.